Azərbaycan, Bakı, 17aprel /Trend, müxbir H.Vəliyev /
Hindistan Azərbaycanda İKT innovasiya mərkəzinin yaradılması təklifi ilə çıxış edir. Bu barədə Azərbaycan-Hindistan ticarət, iqtisadi, elmi və texnoloji əməkdaşlıq üzrə hökumətlərarası komissiyasının növbəti iclası ərəfəsində imzalanan protokolun mətnində deyilir.
Bu layihə ilə bağlı zəruri şərtlər diplomatik kanallar vasitəsilə Hindistanın Azərbaycandakı səfirliyinə təqdim edilib. Hazırda Hindistan tərəfinin cavabı gözlənilir.
Protokolun mətnində qeyd olunur ki, Azərbaycan tərəfi Hindistanla İKT sahəsində sazişin imzalanmasında maraqlıdır. Bununla bağlı əks tərəfin təklifi gözlənilir. Bu məsələyə Hindistan tərəfi hökumətlərarası komissiyanın birinci iclası zamanı baxıb.
Hindistan habelə informasiya texnologiyaları sənayesi sahəsində əməkdaşlıq imkanlarının araşdırılmasına maraq göstərir, bu məqsədlə Azərbaycan nümayəndə heyətinin Hindistana səfərinin və qarşılıqlı anlaşma memorandumunun imzalanmasının vacibliyini qeyd edir.
