Azərbaycan, Bakı, 25 sentyabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyi yanında "Bakı Telefon Rabitəsi" İstehsalat Birliyi Bakı şəhərinin bütün telekommunikasiya qovşaqlarında IP-TV xidmətlərini genişləndirir. Bu barədə çərşənbə axşamı Trend-ə İB-dən məlumat verilib.
Hazırda xidmətlər operatorun Bakının Sabunçu və Nizami rayonlarında yerləşən telekommunikasiya qovşaqlarında açıqdır.
Xidmətlərdən istifadəyə görə aylıq xidmət haqqı dörd manat təşkil edir.
"Yaxın aylarda IP-televiziya xidmətləri operatorun bütün telefon stansiyalarında, əsasən NGN (Next Generation Network) stansiyalarında açılacaq. Habelə, abonentlər üçün "Video on Demand" (sorğu üzrə video), interaktiv televiziya, kanalların HD formatında yayımı və başqa xidmətlər açıq olacaq", - İB-dən deyiblər.
Xidmət dövlət operatorunun şəbəkəsində IP-TV formatında siqnalların ötürülməsini həyata keçirən "Teleradio" İB-nin platformasında açılır.
Operatorun şəbəkəsində ötürülən telekanalların sayı 100 ədəd təşkil edir ki, bu da Bakıda "Teleradio" İB-də quraşdırılan baza stansiyasının buraxılış qabiliyyətinin müasirləşdirilməsindən sonra mümkün olub.
