Azərbaycan, Bakı, 29 noyabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Aztelekom" İstehsalat Birliyi (İB) Abşeron yarımadası üzrə və Qusar, Goranboy rayonlarının kəndlərində NGN (Next Generation Network) şəbəkəsini genişləndirir. Bu barədə cümə axşamı Trend-ə İB-dən deyiblər.
Yeni telefon stansiyaları dekabrın 6-da istismara veriləcək. Kənd stansiyaları optik rabitə xətləri vasitəsilə mərkəzi telekommunikasiya qovşaqlarına qoşulacaq ki, bu da operatorun son istifadəçiyə göstərdiyi rabitə və internet xidmətlərinin keyfiyyətini artıracaq.
Həmçinin, hazırda Masallı telekommunikasiya qovşağının gələcək nəsil şəbəkəsinə keçirilməsi üzrə işlər aparılır.
"Aztelekom"un proqnozlarına əsasən, yaxın vaxtlarda telekommunikasiya qovşaqlarının NGN texnologiyası ilə əhatə olunma səviyyəsi 24 faizə çatacaq.
Abşeron yarımadası, Sumqayıt, Gəncə, Göyçay, Salyan, Şamaxı və Kürdəmir telekommunikasiya qovşaqları artıq NGN operatorunun şəbəkəsi ilə əhatə olunub.
