Azərbaycan, Bakı, 12 iyun /Trend, müxbir H.Vəliyev/
Trans-Avrasiya Super İnformasiya Magistralına (TASİM) qoşulma Əfqanıstanın informasiya təhlükəsizliyini təmin edəcək. Trend-in məlumatına görə, bu barədə Bakıda keçirilən brifinqdə Əfqanıstanın rabitə və informasiya texnologiyaları naziri Əmirzai Sangin bildirib.
Nazirin sözlərinə görə, bu, ölkədə internet xidmətlərindən istifadəyə görə tariflərin sonrakı inkişafına da müsbət təsir edəcək.
Sangin bildirib: TASİM layihəsində bizim iştirakımız birbaşa region ölkələri ilə əməkdaşlıqdan asılıdır. Bu məqsədlə də bu gündən etibarən layihəyə onların köməyi ilə qoşula biləcəyimiz bir sıra ölkələrlə əməkdaşlıq etməyə başlayırıq".
TASİM layihəsi vacib regional təşəbbüsdür və onun məqsədi, əsasən, Qərbi Avropadan Şərqi Asiyaya qədər Avrasiya ölkələrini əhatə edən transmilli fiber-optik xəttin çəkilməsidir. Layihə Frankfurtdan (Almaniya) Honq Konqa istiqamətlənən əsas tranzit xəttinin qurulmasını nəzərdə tutur. Bu xətt Avropanın və Asiyanın ən böyük informasiya mübadiləsi mərkəzlərini birləşdirəcək.