Azərbaycan, Bakı, 27 may /Trend, müxbir H.Vəliyev/
Trans-Avrasiya Super İnformasiya Magistralının (TASİM) tikinti layihəsi üzrə prinsipial sazişin imzalanma tarixi dəyişdirilib. Bu barədə çərşənbə axşamı Trend-ə Azərbaycanın telekommunikasiya bazarındakı mənbə deyib.
Onun sözlərinə görə, imzalanma tarixinin dəyişdirilməsinin səbəbi saziş layihəsinin tam işlənilməsi zərurəti və sənəddə nəzərdə tutulmuş detalların iştirakçı tərəflərlə razılaşdırılmasından ibarətdir.
Sənəd layihənin biznes modelini müəyyənləşdirməyə, trafikin idarə edilməsinin hansı formada həyata keçirilməsinə, investisiya və gəlirlərin bölüşdürülməsinə hesablanıb.
Qeyd edək ki, daha əvvəl sənədin imzalanması 2014-cü ilin ortalarına planlaşdırılmışdı. İlkin məlumata görə, sazişin imzalanması ilin sonunda gözlənilir.
Prinsipial razılığın TASİM layihəsinin tərkib hissəsi olan kabel magistralının Xəzər seqmentinin salınması məsələsini həll edəcəyi ehtimal olunur.
