Azərbaycan, Bakı, 21 avqust /Trend, müxbir Hüseyn Vəliyev/
Azərbaycanda bu ilin sonunadək işıq-diod işıqlandırma (LED Light-emitting diode) mənbələrinin kütləvi istehsalına başlanılması gözlənilir. Bu barədə Trend-ə Rabitə və Yüksək İnformasiya Texnologiyaları Nazirliyinin Yüksək Texnologiyalar üzrə Tədqiqat və İnkişaf Mərkəzindən bildiriblər.
Tədqiqat Mərkəzinin LED istehsalına başlanılması üzrə təklifinə hazırda hökumət tərəfindən baxılır. Mərkəzdən deyiblər ki, hökumətin bu məsələ üzrə yekun qərarı cari ilin sonunadək verəcəyi planlaşdırılır.
İşıq-diod işıqlandırma sistemi həm bəzək, həm də ümumi işıqlandırmada (memarlıq nümunələri, küçələr, parklar və magistral yollarda) istifadə etmək üçün nəzərdə tutulub.
İşıq-diod işıqlandırma texnologiyaları enerji baxımından səmərəli və ekoloji təmiz metoddur. Bu işıqlandırma sistemi adi közərən lampalardan fərqli olaraq, istehlak olunan elektrik enerjisini qənaət etməyə imkan verir.