Azərbaycan, Bakı, 8 sentyabr /Trend, müxbir Hüseyn Vəliyev/
Rusiya proqram təminatı yaradıcısı "Entensys" şirkəti "UserGate Web Filter" məhsulunu Azərbaycan dilinə lokallaşdırmağa hazırlaşır. Bu barədə Trend şirkətin məlumatına istinadən xəbər yayıb.
"UserGate Web Filter" məhsulu dövlət strukturlarında, məktəblərdə, ali məktəblərdə, ictimai Wi-Fi şəbəkələrində və telekommunikasiya şirkətlərində internetdən təhlükəsiz istifadəni təmin edir.
"UserGate Web Filter" bütöv şəbəkə üçün yüklənən məzmunun antivirus yoxlamasını və mərkəzləşdirilmiş filtrasiyanı təmin edən şlüz internet-filtridir. Son istifadəçinin kompüteri üçün həll tələb olunan zaman filtrasiyanın analoji metodlarından istifadə edən "KinderGate Valideyn nəzarəti"ndən istifadə etmək olar.
Məhsul DNS və HTTP-sorğular səviyyəsində filtrasiyanı həyata keçirə bilər. DNS-sorğuların filtrasiyası zamanı "UserGate Web Filter" filtrasiyanın genişləndirilmiş funksiyaları ilə DNS-server kimi işləyir.
