Azərbaycan, Bakı /müx. Trend S.Babayeva/ Parisin yuxarı instansiya məhkəməsi - Apellyasiya məhkəməsinin qərarından sonra Azərbaycan tərəfinin Maltanın FİMbankı ilə çəkişmələri çərçivəsində Rabitə Nazirliyinin 6,5 mln. avro həcmində olan vəsaitlərinin girovunun ləğvinə dair müraciətinə baxılacaq. Bu haqda Parisdə yuxarı istansiya məhkəməsinin iclası zamanı bəlli olub.
Rabitə və İnformasiya Texnologiyaları Nazirliyinin hüquq və kadrlar şöbəsinin rəhbəri Bəxtiyar Məmmədovun cümə günü verdiyi məlumata görə, Apellyasiya məhkəməsi Azərbaycanın xeyrinə çıxarılan qərarla bağlı Malta bankının şikayətinə mayın sonlarında baxacaq və rəyini bildirəcək.
Maltanın FIMbank-ı (First International Merchant Bank Ltd.) Azərbaycandan 4,5 mln. dollarlıq kreditin ödənilməsini tələb edir. Maltalıların iddiasına əsasən, bu kredit Azərbaycanın iki telekommunikasiya şirkətinə dövlət zəmanəti ilə verilib. Azərbaycan isə təkid edir ki, həmin şirkətlər heç vaxt mövcud olmayıb və onlara dövlət zəmanəti verilməyib.
Məlumat üçün bildirək ki, yuxarı instansiya məhkəməsinin müvafiq qərarı 2006-cı ilin noyabrında qəbul edilib. Bu qərara əsasən, FİMbank mənəvi ziyana görə Azərbaycan tərəfinə 5 min avro və məhkəmə-prosedur xərclərinin ödənilməsi üçün 900 avro ödəməlidir. FİMbank sonradan bu məbləği ödəyib, lakin eyni zamanda müvafiq qərardan Parisin Apellyasiya məhkəməsinə şikayət edib.
Xatırladaq ki, FIMbank ilk dəfə şikayətlə 2004-cü ilin iyulunda Rotterdam və Paris məhkəməsinə müraciət edib.