Təfərrüatlar əlavə olunub (ilk xəbər saat 13:33-də yayılıb)
Bakı. Rufiz Hafizoğlu - Trend:
Türkiyənin İstanbul şəhərində partlayış baş verib.
Trend-in "Kanal7" telekanalına istinadən verdiyi məlumata görə, terrorçuların məqsədi xarici turistlər olub. Partlayış məhz xarici turistlərin çox olduğu ərazidə törədilib.
İlkin məlumata əsasən, hadisədə PKK terror təşkilatının əli var.
X X X
15:29
Trend-in "TRT Haber" telekanalına istinadən məlumat verir ki, ölkənin səhiyyə naziri Mehmet Müəzzinoğlu xəsarət alanların sayı 38 nəfərə çatdığını deyib. Onlardan 12-si xarici vətəndaşdır.
Nazirin sözlərinə görə, gün ərzində ikinci terror aktının baş verəcəyi istisna deyil.
X X X
14:16
Trend-in "TRT Haber" telekanalına istinadən verdiyi məlumata görə, hadisənin terror aktı olduğu rəsmən təsdiqlənib.
İstanbul valiliyi ölənlərin sayının 5 nəfərə, yaralıların sayının isə 21 nəfərə çatdığını bildirib.
"Kanal7" telekanalının məlumatına görə, xəsarət alanlardan 3-ü İsrail vətəndaşıdır.
Ətrafda terrorçuların olma ehtimalını nəzərə alan polis ara küçələrdə axtarışa başlayıb.
X X X
14:09
İstanbul valisi Vasip Şahin partlayış nəticəsində terrorçu ilə birlikdə 4 nəfərin öldüyünü, 3-ü ağır olmaqla 20 nəfərin xəsarət aldığını deyib.
Tocarət mərkəzlərinin xeyli sayda olduğu İstiqlal prospektində hazırda bütün dükanlar bağlanıb, satıcılar ərazidən uzalaşdırılıb.
X X X
13:51
"Hürriyyət" qəzetinin məlumatına əsasən, "canlı bomba" vaxtından əvvəl işə düşüb.
Hazırda terrorçunun əsl hədəfinin hara olduğu araşdırılır.
"Sabah" qəzetinin məlumatına görə, hadisə nəticəsində xəsarət alanların sayı 20 nəfər çatıb.
1-i ağır olmaqla, 5 nəfərin Haseki xəstəxanasına yerləşdirildiyi bildirilir.
X X X
13:37
"CNN Türk" telekanalının məlumatına görə, hadisə üzərində partlayıcı qurğu olan naməlum şəxs tərəfindən törədilib.
Hazırda polis hadisə yerində işləyir, Qalatasaray və Taksim meydanlarından prospektə girişlər bağlanıb.
X X X
13:33
Trend-in "Milliyyət" qəzetinə istinadən verdiyi məlumata görə, hadisə nəticəsində 2 nəfər ölüb, 7 nəfər yaralanıb.
Partlayış yerli vaxtla saat 11 radələrində şəhərin məşhur İstiqlal prospektində qeydə alınıb.
Hadisə yerinə çoxlu sayda təcili tibbi yardım briqadaları cəlb olunub.