Bakı. Trend:
Böyük Britaniyaya səfər edən Yamayka hökumətinin nümayəndə heyəti bazar ertəsi Yamayka dövlətinin başçısı olan Kral III Çarlza müraciət təqdim etməyə hazırlaşır. Müraciətdə köləliyə görə təzminat məsələsi qaldırılır. Bu barədə Kinqstonun Mədəniyyət Nazirliyi məlumat yayıb.
Mədəniyyət naziri Olivia Grange nümayəndə heyətinə rəhbərlik edəcək. Nazirlik açıqlamasında bildirib ki, səfərin məqsədi “yüzlərlə il ərzində köləliyə məruz qalmış afrikalı əcdadlar üçün təzminat ödənilməsini tələb edən Yamayka kampaniyasını irəli aparmaqdır”.
Müraciətdə dövlət başçısı olan kraldan transatlantik qul ticarətinin qanuniliyi ilə bağlı üç məsələnin Karib hövzəsində yerləşən adanın Londonda fəaliyyət göstərən ən yüksək apellyasiya məhkəməsinə təqdim edilməsi xahiş olunur.
Nümayəndə heyəti bildirir ki, bu, Birlik ölkələri arasında təzminat məsələsini irəli aparmaq məqsədilə belə hüquqi yoldan istifadə edən ilk ölkədir.
Olivia Grange deyib: “Bu innovativ hüquqi yanaşma illərlə davam edən müzakirələrdən sonra qəbul edilib və afrikalı əcdadlarımızın məruz qaldığı yüzilliklər boyu davam edən ən dəhşətli zorakılıq və ədalətsizliklərin çoxdan gözlənilən şəkildə həll olunmasını təmin etmək məqsədi daşıyır.”
Nümayəndə heyəti üç məsələ ilə bağlı məsləhət xarakterli hüquqi rəy istəyir: Yamaykada afrikalıların kölə vəziyyətində saxlanılması İngiltərə qanunlarına əsasən qanuni olubmu, bu, beynəlxalq hüququ pozubmu və Böyük Britaniyanın bu gün təzminat ödəmək hüquqi öhdəliyi varmı?
Bukingem sarayının sözçüsü bildirib ki, kral “köləlik məsələsinin daha yaxşı başa düşülməsinə və tarixi ədalətsizliklərin müasir icmaların xeyrinə aradan qaldırılması yollarının tapılmasına şəxsi və qeyd-şərtsiz sadiqliyini dəfələrlə ifadə edib”.
Olivia Grange həmçinin Britaniya Muzeyinin rəsmiləri ilə görüşərək müstəmləkəçilik dövrünə aid əşyaların geri qaytarılması məsələsini müzakirə etməlidir.
77 yaşlı monarx və həyat yoldaşı, kraliça Kamilla, Yamaykanı əhatə etməyən xarici səfər çərçivəsində Karib hövzəsinə getməlidirlər.
Müasir Britaniya kral ailəsinin üzvləri öz əcdadlarının zənginləşməsinə səbəb olan qul ticarətinə görə peşman olduqlarını bildiriblər. Lakin onlar rəsmi üzr istəməkdən və təzminat ödəmək öhdəliyi götürməkdən çəkiniblər.
