Azərbaycan, Bakı, 8 iyul /Trend /
Azərbaycanın İordaniyadakı səfirliyindən bazar günü Trend-ə verilən məlumata görə, 4-7 iyul tarixlərində F.Əmirov adına Gəncə Filarmoniyasının "Göy-Göl" Dövlət Mahnı və Rəqs ansamblının üzvləri İordaniya Haşimilər Krallığında təşkil edilmiş 27-ci "Cəraş Mədəniyyət və İncəsənət Festivalı"nda iştirak ediblər.
1981-ci ildən bəri mütəmadi olaraq təşkil edilən Festivalda ölkəmizin nümayəndələri ilə birlikdə Misir, İraq, ABŞ, Suriya və digər ölkələrin təmsilçiləri özlərinin milli mədəniyyət və incəsənət nümunələrini təqdim etmişdir.
"Göy-Göl" Dövlət Mahnı və Rəqs ansamblının üzvləri İordaniyanın qədim şəhərləri Cəraş və Madabada çıxış edərək ölkəmizin zəngin musiqi irsinin nümunələrini ifa etmiş və Festival iştirakçılarının xüsusi rəğbətini qazanmışlar."