Azərbaycan, Bakı, 29 dekabr /Trend/
Qazaxıstanın hüquq-mühafizə orqanları tərəfindən cümə axşamı 1971-ci il təvəllüdlü Yerik Ayazbayevin saxlanması üzrə əməliyyat keçirilib. O, Aqjan Hasenin terrorçu qrupunun liderlərindən biri olub. Trend-in məlumatına görə, bu barədə Qazaxıstan Baş Prokurorluğunun məlumatında deyilir.
Əvvəl xəbər verildiyi kimi, qrupun rəhbəri Aqjan Hasen və qrupun digər üzvləri bu il dekabrın 3-də aktiv silahlı müqavimət göstərmələrinə cavab olaraq hüquq-mühafizə orqanları tərəfindən Almatı vilayətinin Boralday İli qəsəbəsində məhv ediliblər.
Cinayət-axtarış orqanlarından gizlənən Ayazbayevin operativ-axtarış tədbirləri nəticəsində Qızıl Orda şəhərində Amangəldi küçəsi, 3, mənzil 80-də olduğu müəyyənləşib.
Saxlanma prosesində təslim olmaq təklifinə Ayazbayev rədd cavabı verib və Makarov tipli tapançadan atəş açıb. Nəticədə cavab atəşi ilə terrorçu məhv edilib.
Dinc sakinlər və hüquq-mühafizə orqanlarının əməkdaşları arasında ölən və yaralanan yoxdur.
Hadisə yerində təcili əməliyyat tədbirləri görülür.