...

İrandan Azərbaycana külli miqdarda narkotik keçirilməsinin qarşısı alınıb (FOTO)

Hadisə Materials 20 Fevral 2023 12:09 (UTC +04:00)
İrandan Azərbaycana külli miqdarda narkotik keçirilməsinin qarşısı alınıb (FOTO)

Bakı. Trend:

Dövlət sərhədinin etibarlı mühafizəsinin təmin edilməsi, narkotik vasitələrin qanunsuz dövriyyəsinə qarşı mübarizə tədbirləri çərçivəsində Dövlət Sərhəd Xidmətinin Sərhəd Qoşunlarının “Horadiz” və “Göytəpə” sərhəd dəstələrinin əməkdaşları tərəfindən 42 kiloqram 650 qram narkotik vasitənin qaçaqmalçılıq yolu ilə İran İslam Respublikasından Azərbaycan Respublikasına keçirilməsinin qarşısı alınıb.

Dövlət Sərhəd Xidmətindən Trend-ə verilən məlumata görə, keçirilmiş sərhəd axtarışı və əməliyyat tədbirləri nəticəsində fevral ayının 17-də saat 23:40-da Biləsuvar rayonunun Yuxarıağalı kəndi yaxınlığında 1 ədəd bağlamada ümumi çəkisi 8 kiloqram 250 qram narkotik vasitə (7 kq 700 qram “marixuana”, 350 qram “heroin” və 200 qram “tiryək”), fevral ayının 18-də saat 23:30-da Füzuli rayonun Arayatılı kəndi yaxınlığında yerləşən sərhəd zastavasının xidməti ərazisində 2 ədəd bağlamada ümumi çəkisi 20 kiloqram 300 qram narkotik vasitə (19 kq 500 qram “marixuana”, 800 qram “tiryək” və 495 ədəd narkotik tərkibli psixotrop həblər) və fevral ayının 19-da saat 15:25-də Füzuli rayonun Böyük Bəhmənli kəndi yaxınlığında yerləşən sərhəd zastavasının xidməti ərazisində 1 ədəd bağlamada ümumi çəkisi 5 kiloqram 100 qram narkotik vasitə “marixuana” aşkar olunaraq götürülmüşdür.

Bundan əlavə Dövlət Sərhəd Xidməti və Dövlət Təhlükəsizlik Xidmətinin əməkdaşlarının birgə keçirdiyi əməliyyat tədbirləri nəticəsində fevral ayının 19-da saat 09:00 radələrində Zəngilan rayonun Şərifan kəndi yaxınlığında yerləşən sərhəd zastavasının xidməti ərazisində 10-DE-474 dövlət qeydiyyat nişanlı “Nexia” markalı avtomobil şübhə doğurduğu üçün saxlanılmışdır.

Saxlanılan şəxsin 1974-cü ildə Cəbrayıl rayonunun Kürdlər kəndində anadan olmuş, hazırda Saatlı rayonunda yaşayan Balacayev İlham Qara oğlu olduğu müəyyən edilmiş və idarə etdiyi avtomobilə baxış zamanı 2 ədəd bağlamada ümumi çəkisi 9 kiloqram narkotik vasitə “marixuana” aşkar olunaraq götürülmüşdür.

Qeyd olunan faktlar üzrə əməliyyаt-istintaq tədbirləri dаvаm еtdirilir.

Xəbər lenti

Xəbər lenti