Azərbaycan, Bakı, 21 yanvar /Trend, müxbir E.Tariverdiyeva/
ATƏT-in sammitindən sonra Ermənistan və Azərbaycan arasında Dağlıq Qarabağ münaqişəsinin nizamlanması məsələsində müəyyən durğunluq yaranıb. Bu durğunluğu nə iləsə doldurmaq və ərazi mübahisəsinin həllində vasitəçilərin gələcək fəaliyyətinin formatını müəyyən etmək lazım idi. Moskva Dövlət Universitetinin Tarix fakültəsinin dekan müavini, Trend-in Ekspert Şurasının üzvü Aleksey Vlasov belə hesab edir.
"Fikrimcə, hazırda növbəti il üçün planları aydınlaşdırmaq vaxtı gəlib çatıb, - Trend-ə Vlasov Astanadan telefon vasitəsilə bildirib. - Moskvanın bu ikitərəfli dialoqun baş moderatoru olaraq öz səylərini əsirgəməyəcəyini güman etməyə əsas var və yanvarın 24-də çox şey aydınlaşacaq".
Yanvarın 24-nə Moskvada Azərbaycan, Rusiya və Ermənistanın xarici işlər nazirləri Elmar Məmmədyarov, Sergey Lavrov və Edvard Nalbandyanın görüşü planlaşdırılıb. Bu barədə cümə günü jurnalistlərə Ermənistanın xarici işlər naziri deyib. Məlumatı "Novosti-Armeniya" agentliyi yayıb.
Onun sözlərinə görə, görüş RF-nin xarici işlər naziri Sergey Lavrovun təşəbbüsü ilə keçiriləcək.
Ötən ilin noyabr ayında Rusiya, Azərbaycan və Ermənistanın xarici işlər nazirləri Moskvada görüşərək Dağlıq Qarabağ münaqişəsinin nizamalanması məsələsini müzakirə ediblər.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
Vlasovun sözlərinə görə, Rusiya Dağlıq Qarabağ münaqişəsinin nizamlanması mövzusunu yarımçıq qoymaq niyyətində deyil. Ola bilsin ki, bu məsələ Cənubi Qafqazda vəziyyətin nizamlanması üzrə ümumi kontekstə daxil edilsin.
"Bu, beynəlxalq təşkilatların region üzrə fəaliyyətini nəzarətdə saxlamaq üçün ediləcək - bu, Moskvaya bir tərəfdən Dağlıq Qarabağ üzrə baş moderator statusunu saxlamağa, digər tərəfdən beynəlxalq qurumların Gürcüstan məsələsi ilə bağlı hədsiz fəallaşmasına yol verməməyə kömək edən kompleks yanaşmadır", - Vlasov deyib.
2008-ci il avqustun 8-nə keçən gecə tanınmamış "Cənubi Osetiya respublikası"nda irimiqyaslı hərbi əməliyyatlar başlayıb. Gürcüstan qoşunları Sxinvaliyə daxil olub. Sonradan rus qoşunları Sxinvalini tutub və gürcü hərbçiləri Gürcüstan ərazisinə sıxışdırıblar. Avqustun sonlarında Rusiya Cənubi Osetiya və Abxaziyanın müstəqilliyini tanıyıb. Buna cavab olaraq, Tbilisi Moskva ilə diplomatik münasibətləri pozub və iki tanınmamış respublikanı işğal olunmuş ərazilər elan edib.
Politoloqun fikrincə, Moskva Dağlıq Qarabağ münaqişəsinin nizamlanması məsələsində 2010-cu ildə əldə etdiyi tempi azaltmayacaq.
Astana sammitindən sonra yaranan durğunluğu dolduracaq xarici işlər nazirlərinin yanvarın 24-də baş tutacaq görüşündən sonra mühüm dəyişikliklər gözləmək çətindir.
Son 11 il ərzində keçirilməyən ATƏT-in sammiti dekabrın 1-2-də Qazaxıstanın təşkilatda sədrliyi çərçivəsində baş tutub. Sammitə üzv ölkələrin dövlət və hökumət başçıları gəliblər.
Sammit zamanı münaqişə tərəfləri olan Azərbaycan və Ermənistan prezidentləri, həmçinin ATƏT-in Minsk qrupunun həmsədr ölkələrinin nümayəndə heyəti başçılarının birgə bəyanatı qəbul olunub. Bəyanatda Ermənistan və Azərbaycan arasında Dağlıq Qarabağ münaqişəsinin tezliklə həllinə çağırış əks olunub.
