Azərbaycan, Bakı, 17 mart / Trend , müxbir S.İlhamqızı/ "Azadlıq" bloku hesab edir ki, seçki komissiyalarının tərkibinin dəyişdirilməsi ilə bağlı hakimiyyətlə Avropa Şurası Venesiya Komissiyası arasında razılıq əldə olunmaması hələ Seçki Məcəlləsinin dəyişdirilməyəcəyi demək deyil.
"Hakimiyyət prezident seçkisinə az müddət qalmış öz mövqeyindən geri çəkilə və seçki komissiyalarının tərkibi paritet formalaşdırıla bilər"-deyə "Azadlıq" blokunun həmsədri Əli Əliyev Trend a açıqlamasında bildirib.
Azərbaycan hökuməti və Venesiya Komissiyası ölkədə seçki komissiyalarının formalaşdırılmasına dair vahid rəyə gəlməyiblər.
"Biz seçki komissiyalarının formalaşdırılması məsələsi ilə əlaqədar Venesiya Komissiyası ilə danışıqları davam etdirməyə hazırıq. Lakin bu məsələdə Avropada vahid standartlar yoxdur"- Azərbaycan nümayəndə heyətinin üzvü, Milli Məclis Aparatının dövlət quruculuğu üzrə qanunvericilik şöbəsinin müdiri Lətif Hüseynov Trend a açıqlamasında bildirib.
"Azadlıq" bloku hesab edir ki, Seçki Məcəlləsinə dəyişiklik edilməsi Azərbaycan ictimaiyyətinin, siyasi partiyaların və beynəlxalq qurumların nə dərəcədə prinsipial, qətiyyətli olmasından və müqavimət göstərməsindən asılı olacaq: "Hakimiyyətlə Venesiya Komissiyası nümayəndələri arasında görüşün belə nəticəsiz qalacağı əvvəldən də ehtimal olunurdu. Venesiya Komissiyasının bir qərara gələ bilməməsi isə Azərbaycanla bağlı məlumatsızlıqdan irəli gəlir"-deyə "Azadlıq" blokunun həmsədri bildirib.
Müxalifətçi Müsavat Partiyasında da hesab edirlər ki, hakimiyyət seçkiyə az müddət qalmış öz mövqeyini dəyişəcək.
"Seçki komissiyalarının tərkibinin paritet əsasda formalaşdırılması ilə bağlı razılığa gəlinməməsi onu göstərir ki, hakimiyyət azad, ədalətli seçki keçirmək istəmir"-deyə Müsavat başqanı İsa Qəmbər Trend a açıqlamasında bildirib.
Hazırda seçki komissiyaları parlamentdə çoxluq təşkil edən, azlıqda qalan partiyaların və bitərəf deputatların nümayəndələrindən ibarət formalaşıb.
Müxalifət partiyaları isə seçki komissiyalarının iqtidarla müxalifət nümayəndələri arasında bərabər (paritet) şəkildə formalaşdırılmasını tələb edirlər.
Azərbaycanın Prezident Aparatının, Milli Məclisin rəsmiləri, hakim Yeni Azərbaycan Partityası funksiolnerləri isə hesab edirlər ki, seçki komissiyalarının indiki tərkibi özünü doğruldub, ona görə də bu formatın dəyişdirilməsinə ehtiyac yoxdur.