Azərbaycan, Bakı, 14 aprel / Trend , müxbir K.Ramazanova/ Azərbaycan və Türkmənistan prezidentlərinin qarşılıqlı səfəri planlaşdırılır. Bu barədə Azərbaycanın xarici işlər nazirinin müavini Xələf Xələfov bazar ertəsi jurnalistlərə məlumat verib.
" Azərbaycan və Türkmənistan ikitərəfli münasibətlərin inkişafında heç bir məhdudiyyət görmür" - deyə Xələfov bildirib.
Onun sözlərinə görə, tərəflər arasında intensiv dialoqlar aparılır və münasibətlərdə müsbət dəyişikliklər yaranıb.
İki ölkə arasında fikir ayrılığı, əsasən, Xəzər dənizindəki mübahisəli yataqlar və dəniz xətti sərhədinin müəyyən olunması, eləcə də 90-cı illərin əvvəlində Azərbaycanın Türkmənistana yaranmış dövlət borcu ilə əlaqədar kəskinləşib.
İki ölkə arasında münasibətlər Türkmənistanda yeni prezident Qurbanqulu Berdıməhəmmədovun seçilməsindən sonra bərpa olunub. Keçən ilin noyabrında Xəzərin statusu məsələləri üzrə Azərbaycan nümayəndəsi Xələf Xələfov, bu dövr ərzində ilk dəfə olaraq, Aşqabada səfər edib və ikitərəfli münasibətlərin inkişafını müzakirə edib. Apreldə Azərbaycanda Türkmənistanın yeni səfiri təyin olunub. Keçən həftə isə, Türkmənistanın müdafiə nazirinin Azərbaycana ilk rəsmi səfəri baş tutub.
Müəlliflə əlaqə saxlamaq üçün elektron ünvan: [email protected]
