Azərbaycan, Bakı, 12 may / Trend , müxbir C.Babayeva/ Seçki Monitorinq Mərkəzinin (SMM) dövlət qeydiyyatı etibarsız sayılsa və ya ləğv olunsa, Mərkəz Avropa İnsan Haqları Məhkəməsinə müraciət edəcək. SMM-dən bazar ertəsi Trend -a verilən məlumata əsasən, bu barədə Xətai rayon məhkəməsində keçirilən məhkəmə iclasında SMM-in nümayəndəsi İntiqam Əliyev bildirib.
SMM 2008-ci ilin fevralında Ədliyyə Nazirliyində qeydiyyata alınıb. Bundan 2 ay sonra Nazirlik SMM-in qeydiyyatının etibarsız sayılması və ləğvi iddiası ilə məhkəməyə müraciət edib.
Bazar ertəsi Xətai rayon məhkəməsində hakim Tofiq Paşayevin sədrliyi ilə keçirilən növbəti məhkəmə iclasında Ədliyyə Nazirliyinin nümayəndəsi Əfqan Baxışov iddia ərizəsində irəli sürülən məsələləri bir daha müdafiə edib və təşkilatın qeydiyyatının ləğvini xahiş edib.
SMM-in nümayəndəsi Əliyev Nazirliyin iddiasının əsassız olduğunu bildirib.
Hakimin bildirdiyinə görə, hər iki tərəfin mövqeyi ilə bağlı məhkəmə müşavirəyə gedib və yaxın günlərdə tərəflərə bu barədə məlumat veriləcək.
Məqalə müəllifi ilə əlaqə saxlamaq üçün ünvan - trend
