Azərbaycan, Bakı, 13 may / Trend , müxbir C.Babayeva/ Müxalifətyönlü Böyük Quruluş Partiyası (BQP) mayın 16-da Dövlət Əmlakının İdarə Edilməsi üzrə Dövlət Komitəsinin qarşısında piket keçirmək niyyətindədir. Bu barədə çərşənbə axşamı Trend -a partiyanın sədri Fazil Qəzənfəroğlu məlumat verib.
BQP-nin yarandığı vaxtdan indiyədək daimi qərargahı olmayıb. Partiya ayrı-ayrı ünvanlarda icarə haqqı ödəməklə, müvəqqəti obyektlərdə yerləşib. Hazırda isə partiya icarə haqqı ödəməyə maddi imkanı olmadığından qərargahsız qalıb.
Qəzənfəroğlu partiyanın qərargahla təmin olunması üçün ötən il Dövlət Əmlakının İdarə Edilməsi üzrə Dövlət Komitəsinə müraciət edib, lakin Komitənin təklif etdiyi yer partiyanı qane etməyib.
Qəzənfəroğlunun sözlərinə görə, piketin sanksiyalaşdırılması üçün BQP artıq Bakı Şəhər İcra Hakimiyyətinə müraciət göndərib və yaxın günlərdə müraciətə cavab təqdim olunmalıdır.
"Piketin keçirilməsinə Bakı Şəhər İcra Hakimiyyəti tərəfindən icazə verilməsə, BQP məhkəməyə müraciət edəcək", deyə partiya sədri bildirib.
Müxalifətyönlü BQP 2004-cü ildə yaradılıb, 2005-ci ildə dövlət qeydiyyatına alınıb. Partiyanın sədri Qəzənfəroğlu Milli Məclisin deputatıdır.
Məqalə müəllifi ilə əlaqə saxlamaq üçün ünvan - trend
