Azərbaycan, Bakı, 23 may/ Trend , müxbir E.Babayev/ Müxalif Ədalət Partiyasının qarşıdan gələn prezident seçkisi ilə bağlı mövqeyi dəyişib. "Partiyada seçkidə iştirakın tərəfdarları da belə qənaətdədirlər ki, Seçki Məcəlləsi indiki variantda qəbul olunsa, seçkiyə qatılmayaq" - deyə cümə günü Trend -a partiyanın sədr müavini Mütəllim Rəhimli bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. Seçki Məcəlləsinə əlavə və dəyişiklikləri nəzərdə tutan layihənin bu ayın sonunda Milli Məclisdə qəbulu gözlənilir. Dəyişikliklər sırasında dövlət KİV-də təbliğatın qadağan olunması, namizədlər üçün depozitin 33 min manatdan 300 min manata qaldırılması, İnzibati Xətalar Məcəlləsinin tətbiqi nəticəsində namizədliyin qeydiyyatının ləğvinin sadələşdirilməsi kimi məsələlərin yer alması müxalifətin narazılığına səbəb olub və partiyalar daxilində boykota meyl artıb.
Rəhimli bildirib ki, partiya hazırda Milli Məclisin hansı qərar verəcəyini gözləyir. "Partiyada indiyə qədər böyük əksəriyyət seçkiyə getməyi məqsədəuyğun sayırdı, amma indi vəziyyət tam dəyişib. Əgər Milli Məclis əlavə və dəyişiklikləri olduğu kimi qəbul etsə, seçkidə iştirakın mənası qalmır" - deyə Rəhimli əlavə edib.
Müxalifətçi Ədalət Partiyası 1993-cü ildə yaradılıb, 1996-cu ildə ADP-yə birləşib. 2000-ci ildə "Ədalət"çilər ADP-dən ayrılaraq partiyanın fəaliyyətini bərpa ediblər. 2001-ci ildən indiyədək Ədalət Partiyasına İlyas İsmayılov sədrlik edir. İsmayılov 2003-cü ildə Azərbaycanda keçirilmiş prezident seçkilərində prezidentliyə namizəd olub və hazırda Milli Məclisin deputatıdır.
Müxalif Böyük Quruluş Partiyasının sədri Fazil Qəzənfəroğlu da Trend -a bildirib ki, Seçki Məcəlləsinə əlavə və dəyişikliklər indiki variantda qəbul olunsa, seçkidə öz namizədləri ilə iştirak etməyəcəklər.
Milli Məclisin vitse-spikeri Bahar Muradova isə cümə günü Trend -a deyib ki, müxalifətin böykot taktikası seçki prosesinə təsir etməyəcək. Çünki müxalifətin cəmiyyətdəki nüfuzu bu addımı həyata keçirmək üçün yetərli deyil.
İndiyə qədər Müsavat Partityasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkini boykot edəcəyini açıqlayıb.
Müəlliflə əlaqə ünvanı: [email protected]
