Azərbaycan, Bakı, 28 may / Trend , müxbir E.Tanrıverdiyeva, R.Hafizoğlu, Q.Əhmədova/ Pentaqonun Pakistan ərazisində Əl-Kaidənin bazasının mövcudluğu barədə bəyanatından sonra ABŞ çətin ki, Pakistana daxil olsun. Lakin çox ehtimal ki, Vaşinqton İslamabada qarşı təyziq cəhdlərini dayandırmayacaq. "Pentaqonun bəyanatı birinci dəfə deyil ki, səsləndirilir. Vaşinqton isə buna bənzər bəyanatlar verməklə İslamabada təyziq göstərmək istəyir", - deyə pakistanlı politoloq Abdulhay Anis bildirib.
"Al-Jazeera" telekanalının mayın 26-da verdiyi xəbərə görə, Pentaqon Pakistan ərazisində Əl-Kaidə terrorçu təşkilatı bazasının, xüsusilə ölkənin dağlıq və Əfqanıstanla sərhədyani zonalarında yerləşdiyi haqqında bəyanat yayıb.
"Baş nazir Benazir Bhuttonun ölümündən sonra ABŞ Pakistana daxil olmaq üçün müxtəlif bəhanələr axtarır", - deyə çərşənbə günü Trend a İslamabaddan elektron poçt ilə müstəqil politoloq Anis bildirib. Onun fikrinə görə, Pakistan və Əfqanıstanın problemi regionun dağlıq rayonlarında dəqiq siyasi istiqamətləri olmayan yerli silahlı tayfaların yaşamasıdır. Anis hesab edir ki, nə Pakistan ordusu, nə də hökumət bu tayfalara nəzarət etmək iqtidarında deyil."Hətta Rusiya-Əfqanıstan müharibəsində Birləşmiş Ştatlar sözügedən tayfaları dəstəkləyirdi. Bu tayfaları maliyyələşdirərək onları öz maraqları üçün istifadə etmək çox asandı", - deyə politoloq bildirib. Anis hesab edir ki, Əl-Kaidə bunu çox yaxşı anlayır və yerli pakistan və əfqan tayfalarını öz məqsədləri üçün istifadə edir.
"ABŞ-ın Pakistana daxil olması üçün heç bir səbəbi yoxdur. Pentaqonun Pakistan ərazisində Əl-Kaidənin mövcudluğu haqqında bəyanatı Vaşinqton üçün başqasının ərazilərini zəbt etməsinə səbəb ola bilməz", - deyə Londonda terrorizmin öyrənilməsi üzrə mərkəzin rəhbəri Kamal Helbavi (Kamal Helbawi) çərşənbə günü telefonla Trend a bildirib.
Ekspert bu məsələdə Buş administrasiyasının Əfqanıstanda olduğu kimi silahlı gücün istifadə olunmasına heç bir səbəb görmür.
Amerikalı ekspert Qavdat Bahqat (Gawdat Bahqat) hesab edir ki, terrorizmlə mübarizədə terrorizm təhdidini aradan qaldıracaq vahid üsul yoxdu. Hər bir hökumət sosial-iqtisadi şərait, mədəni normalar və hərbi potensialına əsaslanan şəxsi strategiyasını hazırlayır. "Birləşmiş Ştatlar və prezident Müşərrəf arasındakı six birliyin hərbi strategiyası çərçivəsində uğurəldə olunmadı. Lakin bütün səylərə baxmayaraq Taliban və Əl-Kaida Əfqanıstan və Pakistanın dəstəyini alabildi", - deyə Trend a elektron poçt ilə Pensilvaniya Universitetinin Yaxın Şərq üzrə Mərkəzinin direktoru Bahqat bildirib.
Ekspertin fikrincə, yeni seçilmiş Pakistan palamenti ölkə tayfalarının liderləri ilə dialoq aparmaq üsulunu seçib. Hələ ki, yeni üsulun işləyib işləməyəcəyi haqqında hər hansı bir rəy bildirmək çox tezdir."Birləşmiş Ştatlar və digər qərb ölkələri "gözləmə mövqeyində" durmalıdır", -deyə ekspert bildirib. Politoloqun sözlərinə görə, terrorizmlə mübarizə üzrə Pakistan təcrübəsinə işləmək üçün imkan verilməlidir. "Pakistan hökuməti müstəqildir və öz məsuliyyəti altında Pakistan xalqı üçün lazım olan addımları atmaq hüququna malikdir" - deyə Bahqat əlavə edib.
Əl-Kaidə - Sovet qoşunları ilə mübarizə məqsədi ilə 80-ci illərin ortalarında ABŞ-ın köməkliyi ilə Əfqanıstanda yaradılan beynəlxalq terrorçu təşkilatdır. Sovet qoşunlarını Əfqanıstandan çıxartdıqdan sonra Əl-Kaidə mübarizəni ABŞ, "qərb dünyası" ölkələri və islam dövlətlərində onların tərəfdaşlarına qarşı istiqamətləndirdi. Təşkilatın məqsədi islam ölkələrində dünyəvi rejimi devirərək "Böyük İslam Xilafəti" yaratmaqdır.
Müəlliflə əlaqə saxlamaq üçün elektron ünvan: [email protected]
