Azərbaycan, Bakı, 09 iyul/ Trend , müxbir E.Babayev/ Azərbaycanın müxalif Müsavat Partiyasının iyulun 11-də Bakı Şəhər İcra Hakimiyyətinin qarşısında keçirmək istədyi piketə icazə verilməyib. "Bakı Şəhər İcra Hakimiyyəti bizə bu gün göndərdiyi cavab məktubunda heç bir əsas gətirmədən piketə icazə verilmədiyini bildirib", - deyə çərşənbə günü Trend -a Müsavatın Mərkəzi İcra Aparatının rəhbəri Arif Hacılı bildirib.
Trend -un arayışı: Müsavat Bakı Şəhər İcra Hakimiyyətini iyunun əvvəllərində məhkəməyə verib. İyunun 25-də Səbail rayon məhkəməsi Müsavatın iddiası ilə bağlı qərar çıxararaq, partiyanın iddiasını rədd edib. Partiya yaxın vaxtlarda bu qərardan apellyasiya şikayəti verib. Müsavatın iddiasında Bakı meriyasının, partiyanın mayın 4- də keçirmək istədiyi mitinqə müvafiq yer ayrılmaması ilə bağlı qərarının qanunsuz sayılaraq ləğvi tələb olunurdu. Müsavat mayın 4-nə və 18-nə planlaşdırdığı iki mitinqi təxirə salıb. Buna Bakı meriyasının aksiyaçıları Bibiheybət qəsəbəsindəki stadiona göndərmək istəməsi olub. Partiya mitinqin keçirilməsi üçün Ukrayna meydanı, keçmiş "Qələbə" kinoteatrının qarşısı, "Nərimanov" metrostansiyasının ətrafı, Füzuli meydanı və ya Təbriz" (keçmiş "Sevinc") kino-teatrının qarşısındakı ərazilərdən birinin ayrılmasını istəyirdi. Ötən ay partiya Bakı Şəhər İcra Hakimiyyətinin qarşısında piket keçirmişdi.
Hacılı bildirib ki, piketin icazəsiz olaraq keçirilib-keçirilməməsi sabah partiyada müzakirə ediləcək. "Müzakirələr nəticəsində piketi keçirmək və ya təxirə salmaq barədə qərar veriləcək", - deyə o bildirib.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
