Azərbaycan, Bakı, 19 iyul / Trend , müxbirlər D.Xatınoğlu, R.Hafizoğlu / Türkiyə İran və ABŞ arasında vasitəçi kimi rol oynaya bilər, lakin rəsmi Tehran Vaşinqtolna bilavasitə müzakirələrə üstünlük verir. "Türkiyə Iran-ABŞ arasında vasitəçi ola bilər, lakin bilavasitə müzakirələr daha effektivdir", - deyə İran politoloqu Cəfər Mühəmmədi Trend -a bildirib.
İranın XİN başçısı Mənuçehr Müttəki iyulun 18-də Türkiyəyə səfər edib. İRNA Agentliyinin məlumatına əsasən, səfər çərçivəsində ikitərəfli münasibətlər və İranın nüvə proqramı ilə bağlı Türkiyə və İran XİN rəhbərləri arasında müzakirələr aparılıb. Bundan əvvəl iyulun 14-də Fransada keçirilən Aralıq dənizi ölkələri konfransında Türkiyənin Baş naziri Rəcəb Təyyib Ərdoğan bildirmişdi ki, rəsmi Ankara Tehran və Qərb arasında vasitəçi olmağa hazırdır.
"Türkiyə çalışır ki, regionda öz nüfuzunu və imicini artırsın. Buna görə də ABŞ-İran arasında vasitəçiliyə hazır olduğunu bildirib və vasitəçi də ola bilər. Lakin İran və ABŞ bilavasitə müzakirələrə getməsələr, ortada olan problemlər həll olunmayacaq", - deyə Mühəmmədi şənbə günü telefonla Tehrandan bildirib. Onun sözlərinə görə, Türkiyənin özünün Qərblə böyük problemləri var və Avropa Birliyinə qoşula bilmir. "Belə bir halda, Türkiyənin iki böyük güc və düşmən arasında vasitəçi olması nəticəsiz olacaq", - deyə Mühəmmədi hesab edir.
"İran-ABŞ dialoqunun təşəbbüskarı Tehran yox, Birləşmiş Ştatlardır. Türkiyənin isə regionda münaqişələrin həlli istiqamətində vasitəçi kimi çıxış etmək praktikası artıq formalaşıb", - deyə Mustafa Özcan Trend -a bildirib. Onun sözlərinə görə, Türkiyənin ABŞ və İran arasında vasitəçi kimi çıxış etməsi həm İranın, həm də Vaşinqtonun maraq dairəsindədir. Çünki rəsmi Ankara tərfələr arasında balanslı siyasət yürütmək iqtidarındadır.
"Türkiyənin vasitəçi kimi çıxış etməsi üçün artıq zəmin yaranıb. Vaşinqton və Tehran arasında iki seçim yolu var: ya müharibə, ya dialoq. ABŞ isə hazırda İraqdakı müharibədən sonra üçüncüü cəbhəni açmaq, yəni İranla müharibəyə başlamaq iqtidarında deyil və buna görə də İrana qarşı daha mülayim siyasət yürüdür", - deyə Özcan bu gün telefonla İstanbuldan bildirib.
O, hesab edir ki, ABŞ-İran dialoqunun səmərəliliyi Ankaradan deyil, münaqişə tərəflərindən asılıdır.
Ankara isə dialoqlarda sona qədər deyil, ilkin mərhələdə iştirak edəcək.
Müəlliflə əlaqə saxlamaq üçün elektron ünvan [email protected]