...

Azərbaycanda ənənəvi müxalifətin əvəzlənməsi gedir - hakim partiya

Siyasət Materials 6 Avqust 2008 13:48 (UTC +04:00)

Azərbaycan, Bakı, 06 avqust / Trend , müxbir E.Babayev/ Hakim Yeni Azərbaycan Partiyası (YAP) hesab edir ki, Azərbaycanda ənənəvi müxalifətin siyasi meydanı tərk etməsi prosesi başlayıb. "Hazırda köhnə müxalifətin yeni müxalifətlə əvəzlənməsi gedir", çərşənbə günü Trend -a YAP Siyasi Şurasının üzvü, millət vəkili Aydın Mirzəzadə Azərbaycanda ənənəvi müxalifətin qarşıdan gələn prezident seçkilərinə qoşulmamasının səbəblərini şərh edərkən deyib.

Trend -un arayışı: Azərbaycanda prezident seçkiləri oktyabrın 15-də keçiriləcək. Üç müxalifət partiyasının (Xalq Cəbhəsi, Liberal, Vətəndaş və İnkişaf) təmsil olunduğu "Azadlıq" bloku, Klassik Xalq Cəbhəsi Partiyası seçkiləri boykot etmək barədə qərar verib. Müsavat, Vətəndaş Həmrəyliyi, Demokrat, Böyük Quruluş partiyaları isə seçkidə öz namizədləri ilə iştirakdan imtina ediblər.

İndiyə qədər qarşıdan gələn prezident seçkilərində iştirak etmək üçün Mərkəzi Seçki Komissiyasına (MSK) 11 nəfər müraciət edib. Siyasi təşkilatlardan hakim Yeni Azərbaycan Partiyasının namizədi İlham Əliyevin, Ümid Partiyasının sədri İqbal Ağazadənin, Müasir Müsavat Partiyasının sədri Hafiz Hacıyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Liberal-Demokrat Partiyasının sədri Fuad Əliyevin, Yaşıllar Partiyasının sədri Mais Güləliyevin sənədləri MSK-ya təqdim edilib. Bundan başqa, Yaşar Əhmədovun (işsiz), Əlimuxtar Əkbərovun (təqaüdçü), Sevinc Quliyevanın (Sumqayıt Mərkəzi Klinik Xəstəxanasında sanitar), Vüqar Seyidovun (həkim), Qüdrət İsaqovun (AMEA-nın Fizika İnstitutunun aparıcı elmi işçisi) sənədləri MSK-ya təqdim edilib.

Mirzəzadə bildirib ki, seçki öncəsi yaranmış vəziyyət Azərbaycanda müxalifətin yeniləşməsi prosesinin getdiyini göstərir. "Əslində, bunun işartıları hardasa 2000-ci ildə görünürdü. Azərbaycanın ənənəvi, klassik müxalifəti, hansı ki, Azərbaycan Xalq Cəbhəsi üzərində qurulmuşdu, həmin siyasi təşkilatlar yeniləşə bilmirdilər. Həmin qurumlar həmçinin yeni texnologiyalar tətbiq edə, sosial baza ilə yeni formada işləyə bilmirdilər. Ona görə də yeni müxalifət yaranırdı. 2003-cü ildə yeni müxalifət zəif formada idi. Ancaq 2005-ci ildən sonra yeni müxalifət güclənməyə başlayıb. Onlar KİV-lə güclü işləyirlər, Milli Məclisdə təmsil olunurlar. Beynəlxalq qurumlarla əlaqə qurublar", - deyən Mirzəzadə düşünür ki, bu baxımdan artıq Azərbaycanda keyfiyyətcə yeni müxalifət formalaşmağa və güclənməyə başlayıb. "Heç kəs fikirləşməsin ki, yeni müxalifət iqtidarın siyasətini müdafiə edən müxalifətdir. Onlar da iqtidarın siyasətini tənqid edirlər. Amma onlar bunu yeni formada edirlər və kor-koranə şəkildə hər şeyi tənqid etməklə həyata keçirmirlər. Yeni müxalifət köhnə müxalifətdən fərqli olaraq, tənqid etməkdən başqa yeni ideyalar verir", - deyən hakim partiyanın təmsilçisi düşünür ki, builki seçkilərdən sonra, yəni 2010-cu il parlament seçkilərinə qədər Azərbaycanda yeni siyasi mənzərə yaranacaq. Mirzəzadə hakimiyyətin yeni müxalifətin yaranmasında bilavasitə maraqlı olduğunu isə təkzib edib. "Hakimiyyət özünün sosial bazasının güclü olmasında, tərəfdarlarının daha da artmasında maraqlıdır. Hakimiyyət üçün kiminlə siyasi mübarizə aparmağın heç bir əhəmiyyəti yoxdur. İstər köhnə, istərsə də yeni müxalifət hakimiyyətə gəlmək istəyir", - deyə o əlavə edib.

Politolaq Zərdüşt Əlizadə isə bildirib ki, hazırda yeni müxalifətin köhnə müxalifəti tam əvəzləməsi üçün real zəmin yoxdur. Onun sözlərinə görə, indiyə qədər ənənəvi müxalifət yeni müxalifətin yaranmasına maneə törətməyib. Bu baxımdan Əlizadə ənənəvi müxalifətin prezident seçkilərində iştirakdan imtinasının yeni müxalifətin meydana çıxması üçün zəmin yaratdığı fikrini bölüşmür. "Ənənəvi müxalifətin daimi tərəfdarları var. Onların sayı müəyyən qədər azalsa da, həmin partiyaları tam tərk etmirlər. Bu baxımdan mən ənənəvi müxalifətin sıradan çıxacağını düşünmürəm", - deyə o əlavə edib.

Məqalə müəllifi ilə əlaqə ünvanı: [email protected]

Xəbər lenti

Xəbər lenti