Azərbaycan, Bakı, 18 avqust/ Trend , müxbir D.Xatınoğlu/ Əfqanıstan hakimiyyəti narkotik maddələr biznesində daxili və xarici mafiyaların fəallığına baxmayaraq, ölkədə narkotiklərin istehsalı, satışı və qaçaqmalçılığına qarşı müəyyən nailiyyətlər əldə edə bilib. "Narkotiklərlə mübarizədə böyük nailiyyətlərimiz olub, fəaliyyətimizlə bağlı rəsmi statistikanı avqustun 27-də təqdim edəcəyik", - deyə Əfqanıstan Narkotiklər Əleyhinə Nazirliyinin nümayəndəsi Zulmay Əfzali Trend -a bildirib.
Narkotik maddələr üzrə Əfqanıstanın xüsusi məhkəməsinin sözçüsü Sərir Əhməd Bərmək avqustun 17-də mətbuata açıqlamasında bildirib ki, narkotik maddələr biznesilə məşğul olan qrupun 9 üzvünə 16 il müddətinə azadlıqdan məhrumetmə və 20 min dollar həcmində cərimə cəzası tətbiq olunub. Onun sözlərinə görə, bu qrupun məhkum edilmiş üzvləri arasında dörd nəfər rəsmi şəxs də var.
Əfzali bildirib ki, Əfqanıstanın daxilində və xaricində fəaliyyət göstərən narkobiznesmenlər qaçaqmalçılıq yolu ilə ildə 4,5 milyard dollar həcmində qanunsuz pulu ölkəyə daxil edirlər və bu pulun əksər hissəsi terror təşkilatlarına yatırılır. "Əfqanıstanın 22 vilayətində narkotik maddələrin istehsalı tamailə dayandırılıb", - deyə Əfzali bazar ertəsi telefonla Kabildən bildirib.
Əfqanıstanın narkotiklər əleyhinə naziri general Xodaydad avqustun 16-da mətbuata açıqlamasında bildirib ki, Əfqanıstan vilayətlərinin 75 faizində narkotik maddələrin istehsalı azalıb. Əfqanıstanda hazırda 34 vilayət və 371 şəhər var. Əfqanıstan Konstitusiyasının 7-ci bəndinə uyğun olaraq , narkotik maddələrin sitehsalı və satışı qadağan edilib.
Əfzali əlavə edib ki, dünyada narkobizneslə məşğul olan mafiyalara qarşı beynəlxalq ictimaiyyətin mübarizəsi yetərincə deyil. Əfqan xaqlı narkotik maddələrin qurbanına çevrilib. Narkotiklərlə mübarizə istiqamətində Əfqanıstana edilən xarici yardımlar və beynəlxalq dövlətlərin bu sahədə əməkdaşlığı çox zəifdir.
Əfzalinin sözlərinə görə, əfqan xalqı ciddi şəkildə narkotiklərə qarşı mübarizə aparır və hakimiyyət dairələri də bu sahədə fal şəkildə çoxsaylı layihələr həyata keçirir.
BMT-nin 2007-ci ildə yaydığı məruzədə bildirilib ki, dünya üzrə istehsal olunan tiryəkin 92%-i və heroinin 93%-i Əfqanıstanın payına düşür. BMT-nin statistikalarına əsasən, keçən il Əfqanıstanda 8200 ton tiryək istehsal olunub.
Məqalə müəllifi ilə əlaqə saxlamaq üçün elektron ünvan [email protected]
