Fransa, Strasburq, 01 dekabr / Trend , müxbir A.Məhərrəmov/ Qafqazda münaqişələrin həlli üçün bütün tərəflərin güzəştə getməsi lazımdır.
"Razılıq əldə etmək üçün həmişə güzəştə getmək lazımdır. Güzəştə gedərkən, şübhəsiz ki, nəyisə qurban verməli olursan. Elə bir qərar müəyyən etmək lazımdır ki, münaqişə tərəflərinin heç biri narazı qalmasın və hamı yetərincə təmin olunsun", - Avropa Şurası Venesiya Komissiyasının katibi Canni Bukikkio Trend -a müsahibəsində deyib.
Bukikkionun sözlərinə görə, Venesiya Komissiyası siyasi orqan olmadığından, dondurulmuş münaqişələri həll edə bilməz, amma onların həllinə yardım edə və bu həlli yüngülləşdirə bilər.
"İşə qarışmağımız üçün, bizə müraciət etməlidirlər. İstənilən münaqişədə minimum iki tərəf olur. Qafqaza gəlincə, hər iki tərəf və ya ATƏT-in Minsk Qrupu bizə müraciət etməlidir. Beynəlxalq təşkilatlardan başqa, hər iki ölkənin prezidentləri addım ata bilərlər. Hazırki vəziyyəti və Azərbaycan və Ermənistan prezidentlərinin mandatlarının yeni olduğunu nəzərə alaraq, inanıram ki, onlar birlikdə bu münaqişənin həllinə mühüm təkan verə bilərlər", - katib söyləyib.
Müəlliflə əlaqə ünvanı: [email protected]
