Azərbaycan, Bakı, 04 dekabr/ Trend , müxbir A.Hüseynbala/ Azərbaycan müxalifətinin yeni əməkdaşlıq modeli ilə bağlı hazırlanan layihələrdə bir-birinə zidd məqamlar var.
"Bizim layihədə siyasi partiyaların, ictimai təşkilatların, hətta bəzi siyasi məsələlərdə mövqeləri üst - üstə düşməyən siyasi qüvvələrin əməkdaşlığı nəzərdə tutulur", - cümə axşamı TrenNews - a müxalif Müsavat Partiyasının Mərkəzi İcra Aparatının rəhbəri Arif Hacılı bildirib.
Trend - un arayışı: Müxalifətin Əməkdaşlıq Mərkəzində təmsil olunan Müsavat və Azərbaycan Xalq Cəbhəsi partiyaları müxalifətin gələcək əməkdaşlığını nəzərdə tutan layihələr hazırlayıblar.
Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiaysı və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15 - də keçirilən prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri - legitim elan edilib.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar üzündən müxalifətin geniş koalisiyasının yaranması baş tutmur.
Hacılının sözlərinə görə, Müsavatın hazırladığı layihədə müxalifətin daha geniş koalisiyasının yaradılması imkanları var. "Bizim nəzərdə tutduğumuz birliyə Müsavat, "Azadlıq" blokunda təmsil olunan və blokdan kənarda qalan ictimai təşkilatlar, ayrı - ayrı birliklər də daxil ola bilər", - Hacılı deyib.
Müsavat funksionerinin fikrincə, Azərbaycan Xalq Cəbhəsi Partiyasının (AXCP) hazırladığı sənəddə daxili və xarici siyasətin, demək olar, bütün aspektlərini özündə əks etdirən vahid bir siyasi təşkilatın yaradılması nəzərdə tutulur: "Bu layihədə partiyalar qarşısında çox böyük öhdəliklərin götürülməsi şərti irəli sürülür. Məsələn, Müsavat faktiki olaraq həmin quruma daxil olsa, oradakı hətta çox kiçik bir qrupun da iradəsinə uyğun siyasət aparmaq məcburiyyətində qalacaq", - Hacılı vurğulayıb.
Müsavat Partiyası 1911- ci ilin oktyabrında Bakıda yaradılıb. Müsavat Partiyasının III (Bərpa) Qurultayı 1992 - ci il noyabrın 7- də Bakıda Respublika sarayında keçirilib. Gizli səsvermənin yekunları əsasında Qəmbər səs çoxluğu ilə Müsavat Partiyasının başqanı seçilib.
Qəmbər Azərbaycan parlamentinin spikeri (1992 -1993-cü illərdə) və 2003 - cü ildə keçirilmiş prezident seçkisində prezidentliyə namizəd olub. Partiya 4 nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
