Azərbaycan, Bakı, 15 yanvar / Trend , müxbir A.Hüseynbala/ Azərbaycanın müxalif partiyası referendumla bağlı təsis edilən təşviqat qrupuna qoşulub.
"Partiyanın Siyası Şurasının iclasında müxalif siyasi qüvvələrin və ictimai təşkilatların təsis etdiyi "Qarabağ və Respublika Uğrunda Vətəndaş Hərəkatı"na daxil olmaqla bağlı qərar qəbul edilib, - cümə axşamı Trend -a Vətəndaş Həmrəyliyi Partiyasından bildirilib.
Trend -un arayışı: Azərbaycanın hakim partiyası "Yeni Azərbaycan", müxalif Müsavat Partiyası "Respublikaçılar" referendum üzrə təşəbbüs qrupları yaradıblar. YAP təşəbbüs qrupunun qeydə alınması üçün toplanan imza vərəqələrini yanvarın 14-də Mərkəzi Seçki Komissiyasına təqdim edib.
Bundan əlavə "Azadlıq" blokuna daxil olan Xalq Cəbhəsi, Milli Birlik Hərəkatı, Vətəndaş və İnkişaf partiyaları, o cümlədən "Azərbaycan Naminə" İctimai Birlik, Demokrat Partiyası və bir sıra qeyri-hökumət təşkilatları "Qarabağ və Respublika Uğrunda Vətəndaş Hərəkatı", Klassik Xalq Cəbhəsi, Azadlıq, Milli Demokrat, Böyük Azərbaycan və Xalq patiyalarının təmsil olunduğu Demokratiya Uğrunda İttifaq "Azərbaycan Xalq Cümhuriyyəti", Azərbaycan Milli İstiqlal Partiyası isə "Milli İstiqlal" təşəbbüs qrupunun yaradılması barədə qərar verib.
Hakim partiyanın icra katibinin müavini Mübariz Qurbanlı daha öncə Trend -a bildirib ki, müxalifət partiyalarının referendum əleyhinə yaratdıqları təşəbbüs qrupları effektsiz olacaq.
Azərbaycan parlamenti ötən ayın sonunda keçirilən iclasında Konstitusiyaya əlavələr və dəyişikliklər edilməsi ilə bağlı referendumun martın 18-də keçirilməsi barədə qərar qəbul edib.
Konstitusiyanın 29 maddəsinə dəyişiklik edilməsinə dair referendumun keçirilməsi barədə qərar verilib.
Azərbaycan Respublikası Konstitusiyasının mətninə dəyişikliklər yalnız referendum vasitəsilə daxil edilə bilər (maddə 152). AR Konstitusiyasının mətninə dəyişikliklər Milli Məclis və ya prezident tərəfindən təklif edilirsə, o zaman təklif edilən dəyişikliklər üzrə əvvəlcədən AR Konstitusiya Məhkəməsinin qərarı alınmalıdır (maddə 153).
Azərbaycan Konstitusiyası 1995 - ci ildə referendum yolu ilə qəbul olunub, 2002 - ci ildə Əsas Qanuna əlavə və dəyişikliklər edilib.
"Biz bir siyasi qüvvə olaraq bu ümummilli məsələdə ayrıca bir təşəbbüs qrupu ilə çıxış etməyə ehtiyac görmür, ümumi müxalifətin vahid cəbhədə dayanması zərurətini nəzərə alaraq "Qarabağ və Respublika Uğrunda Vətəndaş Hərəkatı"na qoşularaq, onun fəaliyyətini dəstəkləyirik. Əməkdaşlıq etdiyimiz dövrdə partiya öz resursları ilə hərəkatın fəaliyyətinin effektliliyinin yüksəlməsi üçün lazımi addımlar atacaq və zəruri işlər görəcək", - məlumatda qeyd edilir.
Vətəndaş Həmrəyliyi Partiyası Milli Azadlıq
Hərəkatının liderlərindən olan Sabir
Rüstəmxanlının rəhbərliyi altında 1992-ci il
sentyabrın 26-da bir qrup ziyalı tərəfindən
yaradılıb. 1992-ci il noyabrın 3-də dövlət
qeydiyyatına alınan VHP 1995, 2000, 2005-ci illərdə
parlament, 2003-cü il prezident, 1999, 2004-cü il
bələdiyyə seçkilərində iştirak edib.
Partiyanın sədri millət vəkili, xalq şairi
Rüstəmxanlı 1991-95-ci illərdə mətbuat və
informasiya naziri, 2003-cü il prezident seçkisində isə
prezidentliyə namizəd olub.
Məqalə müəllifi ilə əlaqə ünvanı: [email protected]
