Azərbaycan, Bakı, 29 yanvar / Trend , müxbir K. Zərbalıyeva/ Azərbaycanda insan hüquqlarının vəziyyəti ilə bağlı BMT-də dinləmələr keçiriləcək.
Azərbaycanda insan hüquqları sahəsindəki vəziyyəti əks etdirən Universal Dövri İcmal adlı hesabat Cenevrədə BMT-nin İnsan Hüquqları Şurasının 4-cü sessiyası çərçivəsində fevralın 2-4-də keçiriləcək iclasında müzakirəyə çıxarılacaq. Bu barədə BMT-nin İnsan Haqları üzrə Ali Komissarlığının Azərbaycan nümayəndəliyindən cümə axşamı Trend -a bildiriblər.
Ədliyyə Nazirliyindən Trend -a verilən məlumata görə, hesabatda İnsan hüquqlarının bütün sahələri üzrə vəziyyət əksini tapib.
Hesabatın hazırlanması üçün ölkə başçısının sərəncamıyla əlaqədar qurumların nümayəndələrinin, mütəxəssislərin iştirakı ilə işçi qrup yaradılıb.
Nazirlikdən bildirilib ki, Azərbaycan BMT-nin ayrı-ayrı hüquqlarla bağlı qəbul etdiyi Konvensiyaları ratifikasiya edib və həmin Konvensiyaların icrası ilə bağlı bu quruma hesabatlarını təqdim edib.
BMT-nin İnsan Hüquqları Şurasının 4-cü sessiyası fevralın 2-dən 13-dək Cenevrədə keçiriləcək. Sessiyada 16 dövlətin insan hüquqları sahəsindəki vəziyyəti əks etdirən Universal Dövri İcmal adlı hesabatı dinləniləcək və hesabat ətrafında müzakirələr aparılacaq. Azərbaycan BMT-də ilk dəfə olaraq belə bir hesabatla çıxış edəcək.
Azərbaycanla bərabər Rusiya, Kanada, Kuba, Meksika, Səudiyyə Ərəbistanı, Almaniya və digər dövlətlərin də bu sahədə hesabatları dinləniləcək.
Azərbaycan nümayəndə heyətinə xarici işlər nazirinin nüavini Xələf Xələfov rəhbərlik edəcək.
Azərbaycan Şuraya qəbul olunarkən öz üzərinə bir sıra öhdəliklər götürüb və bu öhdəliklərdən biri də Universal Dövri İcmal (UDİ) mexanizmi ilə bağlıdır.
Məqalə müəllifi ilə əlaqə ünvanı:[email protected]
