Azərbaycan, Bакı, 10 mart / Trend , müxbir A.Hüseynbala /
Azərbaycan və Türkiyə parlamentlərində təmsil olunan partiyaların görüşü üçün hazırlıq gedir.
"Görüşün baş tutması üçün Türkiyənin Böyük Millət Məclisində təmsil olunan partiyalara müraciətlər və müvafiq sənədlər hazırlanır", - çərşənbə axşamı Trend -a Azərbaycan parlamentində təmsil olunan müxalifyönlü Böyük Quruluş Partiyasının (BQP) başqanı Fazil Mustafa bildirib.
Trend -un arayışı: 2008-ci ilin axırlarında Azərbaycan parlamentində təmsil olunan altı partiya - Ana Vətən, Bütöv Azərbaycan Xalq Cəbhəsi, Böyük Quruluş, Vətəndaş Həmrəyliyi və Ədalət partiyaları Türkiyənin siyasi partiyaları ilə görüş keçirmək barədə razılığa gəliblər. Görüşdə məqsəd Türkiyə-Ermənistan münasibətləri ilə bağlı hər iki cəmiyyətdə yaranan narahatlığı müzakirə etməkdir.
Ermənistan-Türkiyə əlaqələri 1993-cü ildən kəsilib. Buna səbəb Ermənistanın beynəlxalq aləmdə qondarma "erməni soyqırımı" iddiaları ilə Türkiyəyə qarşı kampaniya aparması və Azərbaycanın 20 faiz ərazisini işğal etməsi olub. 2008-ci il sentyabrın 6-da futbol üzrə Avropa Çempionatı qrup oyunları çərçivəsində keçirilən Ermənistan -Türkiyə oyununa Ermənistan Prezidenti Serj Sarkisyan Türkiyə Prezidenti Abdulla Gülü Yerevana dəvət edib. Dəvəti qəbul edən Gülün bu səfərindən sonra iki ölkə arasında münasibətlərin normallaşdırılması üçün diplomatik səylər davam etdirilir.
Mustafanın sözlərinə görə, görüşə Türkiyənin beş partiyasının hər birindən iki nümayəndənin dəvət olunması nəzərdə tutulur. "Bizim əsas müzakirə mövzumuz son vaxtlar tez-tez gündəmə gətirilən Türkiyə-Ermənistan münasibətləri, bunun Dağlıq Qarabağ probleminin həllində Azərbaycan üçün nə qədər səmərəli ola biləcəyi, eləcə də digər məsələlər olacaq", - BQP başqanı əlavə edib.
Millət vəkili deyib ki, Bakıda keçiriləcək görüşün sonunda bəyanat qəbul olunacaq. "Həmin sənəddə qarşılıqlı razılaşdırdığımız məsələlər öz əksini tapacaq", - Mustafa vurğulayıb.
Milli Məclisin üzvü görüşdə Türkiyənin hakim Ədalət və İnkişaf Partiyasının nümayəndələrinin iştirakını da istisna etmir.
Müxalifətyönlü Böyük Quruluş Partiyası 2004-cü ildə yaradılıb, 2005-ci ildə dövlət qeydiyyatına alınıb. Partiyanın sədri Fazil Mustafa (Fazil Qəzənfəroğlu) Milli Məclisin deputatıdır. Partiya sədri 2008-ci ildə keçirilən prezident seçkisində namizəd olub və 2,4 faiz səs toplayıb.
Məqalə müəllifi ilə əlaqə ünvanı:[email protected]
