Azərbaycan, Bakı, 25 avqust / Trend , müxbir C.Babayeva /
Azərbaycanın müxalifyönlü Müasir Müsavat Partiyası (MMP) bələdiyyə seçkisinə hazırlıq işlərini başa çatdırıb.
"Partiyanın bələdiyyələrə namizədlərinin siyahısı hazırlanıb. Siyahıda 3200 namizəd var ki, onların da əksəriyyətini qadınlar və gənclər təşkil edir. Partiya Mərkəzi Seçki Komissiyasının bələdiyyə seçkisinin keçirilmə günü ilə bağlı qərarını gözləyir", - çərşənbə axşamı Trend -a MMP sədri Hafiz Hacıyev bildirib.
Trend -un arayışı: Azərbaycanda bələdiyyə seçkisinin bu ilin dekabr ayının ortalarında keçirilməsi gözlənilir.
Hacıyevin sözlərinə görə, bəzi siyasi partiyalar bələdiyyə seçkisində birgə iştirakla bağlı müraciət etsələr də, Müasir Müsavat Partiyası seçkidə müstəqil iştirakı daha məqsədəuyğun hesab edib.
MMP sədri seçkidə bələdiyyələrə namizədlərin şanslarını yüksək qiymətləndirib. "Namizədlərimizin bələdiyyələrin 15-20 faizində qələbə qazanacağını gözləyirik", - Hacıyev deyib.
Trend -un arayışı: Hafiz Hacıyev 1992-93-cü illərdə "Azərbalıq" Dövlət Konserninin sədri olub. 2000-ci ildə Müasir Müsavat Partiyasını təsis edib, partiya 2002-ci ildə dövlət qeydiyyatından keçib. Müasir Müsavat Partiyası özünü iqtidara qarşı konstruktiv müxalifət hesab edir.
Məqalə müəllifi ilə əlaqə ünvanı: [email protected]
