Azərbaycan, Bakı, 30 sentyabr /Trend, müxbir T.Hacıyev/
Azərbaycanın müxalif Xalq Cəbhəsi (AXCP) və Müsavat partiyalarının birliyinə Klassik Xalq Cəbhəsinin (KXCP) qoşulması barədə fərqli fikirlər mövcuddur.
KXCP təşkilat şöbəsinin müdiri Xəzər Teyyub cümə axşamı Trend-ə açıqlamasında bildirib ki, təmsil etdiyi partiya hər zaman birliyin tərəfdarı olub.
"AXCP öz qurultayında Müsavatla birləşmə haqqında qərar verib. Bu gün birləşmək, bir yerdə olmaq xeyirli bir şeydir. Müxalifətin bir yerdə olmasını alqışlayıram, amma KXCP-nin iştirakı olmasa, o birlik tam olmayacaq. KXCP-siz, kimin haradan olmasından asılı olmayaraq, səmimi birləşmə olmayacaq", - Teyyub əlavə edib.
Azərbaycanın müxalif Xalq Cəbhəsi (AXCP) və Müsavat partiyalarının birliyinə Klassik Xalq Cəbhəsi Partiyası (AXCP) da qoşula bilər. Bu barədə bazar ertəsi Trend-ə Müsavat Partiyası Məclisinin sədri Sülhəddin Əkbər bildirmişdi.
"AXCP ilə Müsavatın birliyi yarandıqdan sonra, biz bu birləşmə prosesini bitmiş hesab etməyəcəyik. Ondan sonra da davam etdirəcəyik. Biz "açıq qapı" siyasəti aparmaq niyyətindəyik. Gələcəkdə iki variant mümkündür. Ya danışıqlar prosesinə Klassik Xalq Cəbhəsi Partiyası da daxil edilə bilər və yaxud bu birlik başa çatdıqdan sonra da danışıqlar davam etdirilə bilər", - Əkbər əlavə edib.
İyulun 15-də AXCP-nin yaranmasının 21 illiyinə həsr olunmuş tədbirdə Müsavat başqanı İsa Qəmbər Rəsulzadə-Elçibəy yolunda olan siyasi partiyaların birləşməsini təklif edib. Bu təklifə ilk reaksiya AXCP-dən gəlib. AXCP-nin şənbə günü keçirilən qurultayında Müsavatla birləşmək haqqında qərar qəbul olunub.
AXCP-nın sədr müavini Nurəddin Məmmədli isə cümə axşamı Trend-ə açıqlamasında bildirib ki, digər partiyaların bu birliyə qoşulması yalnız AXCP-Müsavat birliyi baş tutduqdan sonra mümkün ola bilər.
"Əgər ilkin mərhələdə bu birləşmə prosesinə kimliyindən asılı olmayaraq, üçüncü tərəf qoşularsa, çox pis bir presedent yaranacaq. Çünki çoxlu sayda partiyalar, eyni zamanda, birləşmə ideyasını ortaya qoyacaq və artıq bu konteksdə güc məsələsi, cəmiyyətə təsir imkanları, nüfuz məsələsi arxa plana keçəcək. Burada bəziləri düşünülmüş, bəziləri düşünülməmiş şəkildə prosesi həllolunmaz məcraya yönəldəcəklər. Ona görə də biz ilkin mərhələdə ölkənin iki aparıcı müxalifət partiyasının birlik ideyasını reallaşdırıb ortaya qoyandan sonra, digər partiyaların bu birliyə qoşulması məsələsinə baxılaraq çox ciddi nəticələr əldə etmək olar", - Məmmədli bildirib.