Azərbaycan, Bakı, 23 aprel /Trend, müxbirlər E.Tariverdiyeva, R.Zamanov/
İran Kanada hökumətinin bu yaxınlarda "əl-Qaidə" terror qruplaşması və rəsmi Tehran arasında güman edilən əlaqələr barədə bəyanatını rədd edir.
İran törədildiyi yerdən asılı olmayaraq, istənilən terror aktının əleyhinədir. Trend-in "Mehr" agentliyinə istinadən verdiyi məlumata görə, bu barədə İran XİN-in rəsmi nümayəndəsi Ramin Mehmanpərəst bildirib.
Kanada məmurları bildirmişdilər ki, Torontoda sərnişin qatarında terror aktına cəhdlə əlaqədar "əl-Qaidə"nin iki üzvü həbs olunub.
Ottava iddia edir ki, şübhəli şəxslərin "əl-Qaidə"nin İrandakı özəyi ilə əlaqələri var.
Lakin Mehmanpərəst bu ittihamı Kanadanın anti-İran kampaniyasının və iranofobiya ab-havası yaratmaq cəhdinin bir hissəsi kimi rədd edib.
O, həmçinin terrorizmlə mübarizədə Qərb ölkələrinin ikili standartlarından danışıb.