Azərbaycan, Bakı, 9 oktyabr /Trend, müxbir V.İmanov/
Azərbaycan prezidentliyinə namizəd İqbal Ağazadə 19 saylı Nərimanov Birinci Seçki Dairəsinin 7 saylı seçki məntəqəsində səs verib.
Trend-in məlumatına görə, İ.Ağazadə səsvermədən sonra jurnalistlərə bildirib ki, seçki prosesi davam edir. Seçki prosesini dəyərləndirmək hələ çox tezdir: "Amma biz dövlətimiz üçün millətimizə uğur arzulaya bilərik".
Qeyd edək ki, bu gün Azərbaycanda prezident seçkiləri keçirilir.
Prezident seçkisində 10 namizəd mübarizə aparır. Bunlar Yeni Azərbaycan Partiyasından (YAP) partiyanın sədri, Azərbaycan Prezidenti İlham Əliyev, Ümid Partiyasının sədri, deputat İqbal Ağazadə, öz təşəbbüsü ilə namizədliyini irəli sürmüş, deputat Zahid Oruc, Bütöv Azərbaycan Xalq Cəbhəsi Partiyasının sədri, deputat Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Sosial Demokrat Partiyasının sədri Araz Əlizadə, Milli Dirçəliş Hərəkatı Partiyasının sədri, deputat Fərəc Quliyev, "Demokratik Qüvvələrin Milli Şurası" Seçicilərin Təşəbbüs Qrupu tərəfindən namizədliyi irəli sürülmüş Cəmil Həsənli, Ədalət Partiyasının sədri, deputat İlyas İsmayılov, Azərbaycan Demokrat Partiyasının sədri Sərdar Cəlaloğludur.
Azərbaycanın Mərkəzi Seçki Komissiyası tərəfindən 5 145 643 seçici qeydə alınıb.