Azərbaycan, Bakı, 25 dekabr /Trend, müxbir İ.İzzət/
2013-cü ildə Azərbaycan Respublikasının Prezidenti yanında Strateji Araşdırmalar Mərkəzi (SAM) elmi-tədqiqat, elmi-təşkilatçılıq, analitik-informasiya və elmi-nəşriyyat istiqamətləri üzrə öz çoxşaxəli fəaliyyətini daha da genişləndirib. Trend-in məlumatına görə, bunu SAM-ın direktoru Fərhad Məmmədov Mərkəzin 2013-cü ildə fəaliyyətinə dair hesabatının təqdimatı zamanı bildirib.
Onun sözlərinə görə, Azərbaycanla yanaşı, SAM-a da maraq getdikcə böyüyür və onun xarici əlaqələri genişlənir: "Bu ilin əvvəlində beyin mərkəzlərin reytinqində SAM irəliləyərək 128-ci yeri tutub. İnanırıq ki, 2014-cü ilin yanvarında açıqlanacaq yeni reytinqdə SAM öz yerini daha da yaxşılaşdıracaq".
F.Məmmədov qeyd edib ki, cari ildə SAM tərəfindən ümumi olaraq 15 monoqrafiya, toplu və broşüra çap edilib. Müxtəlif elmi-tədqiqat işlərinin yekunu olan bu nəşrlərdən beşi xaricdə (AFR, Türkiyə və Rusiya Federasiyası), onu isə Azərbaycanda işıq üzü görüb. Eyni zamanda, SAM-ın əməkdaşları tərəfindən 91 qapalı xarakter daşıyan arayış və hesabat hazırlanıb, 178 məqalə çap edilib və 156 çıxış və müsahibə verilib.
Beynəlxalq səviyyədə əməkdaşlıq daha da genişləndirilib. 5 beyin mərkəzi (Çin Xalq Respublikasının Müasir Beynəlxalq Münasibətlər Akademiyası, Çin Xalq Respublikasının Sosial Elmlər Akademiyasının Rusiya, Şərqi Avropa və Mərkəzi Asiya İnstitutu, İraq Strateji Araşdırmalar Qrupu, Avropa Siyasət Mərkəzi və Koreya Beynəlxalq İqtisadi Siyasət İnstitutu) ilə memorandum və sazişlər imzalanıb, 8 ölkəni təmsil edən xarici ekspertlərlə birgə 15 mövzu ətrafında araşdırmalar aparılıb və müvafiq hesabatlar hazırlanıb. Eyni zamanda 129 xarici ezamiyyətə qatılmış SAM əməkdaşları Mərkəzi beynəlxalq səviyyədə təmsil ediblər.
Elmi-təşkilatçılıq baxımından 2013-cü ildə SAM tərəfindən Azərbaycanda və xaricdə 56 tədbir keçirilib. Onlardan iyirmi səkkiz tədbir (4 kitab təqdimatı, 2 mühazirə, 2 qapalı ekspert görüşü, 5 seminar, 1 "dəyirmi masa", 3 elmi-praktiki konfrans, 1 beynəlxalq simpozium, 7 beynəlxalq konfrans, 2 beynəlxalq forum, 1 qurultay) Azərbaycanda, digər 28 tədbir isə (2 kitab təqdimatı, 1 qapalı ekspert görüşü, 7 seminar, 4 "dəyirmi masa", 14 beynəlxalq konfrans) xaricdə təşkil edilib. Azərbaycanda keçirilmiş 28 tədbirlərdən on biri yalnız SAM, on yeddi tədbir isə SAM-ın tərəfdaşları ilə birgə təşkil edilib. Xaricdə təşkil edilmiş 28 tədbirin hər biri birgə əməkdaşlıq nəticəsində həyata keçirilib.
Ümumilikdə cari ildə SAM-ın Azərbaycanda təşkil etdiyi müxtəlif tədbirlərə 246 xarici alim və ekspert qatılıb: "SAM bir çox ölkələrlə çoxşaxəli əməkdaşlıq edir. Lakin elə ölkələr var ki, onlarla əməkdaşlıq Azərbaycan üçün bir sıra məsələlər baxımından çox önəmlidir. məsələn, biz Azərbaycan üçün vacib məsələlərlə bağlı qətnamələrin verilməsi istiqamətində ərəb ölkələri əməkdaşlığa xüsusi əhəmiyyət veririk".
O, qeyd edib ki, artıq gələn il üçün fəaliyyət planı artıq hazırdır və Prezident Adminstrasiyasına təqdim edilib.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
