Azərbaycan, Bakı, 21 fevral /Trend/
Müxalif UDAR partiyasının lideri Vitali Kliçko bəyan edib ki, müxalifət Maydandakı fəallarla əlavə məsləhətləşmələr apardıqdan sonra Ukraynada böhranın nizamlanması haqqında sazişi imzalamağa hazırdır.
Trend-in məlumatına görə, bu barədə RİA Novosti Almaniyanın "Bild" qəzetinə istinadən xəbər verir.
V. Kliçko qeyd edib: "Biz böhranın sülh yolu ilə nizamlanması üçün hər şey etməyə hazırıq. Mən bu barədə qərarı Almaniyanın xarici işlər naziri Frank-Valter Ştaynmayerə bildirmişəm".
Bu arada Almaniya XİN "Twitter" səhifəsində Maydandakı etirazçıların Ukrayna hökuməti ilə sazişin imzalanmasına razı olduqları barədə məlumat yayıb.