Azərbaycan Respublikasının baş prokuoru Zakir Qaralov prokuroruq əməkdaşlarının da yeni yaradılacaq Ali Ədliyyə Məktəbinin tədrisindən yararlanmağı təklif edib. Trend xəbər verir ki, bu təklif fevralın 2-də Məhkəmə-Hüquq Şurasının geniş toplantısında baş prokuror tərəfindən səslənib.
Z.Qaralov bildirib ki, Ali Ədliyyə Məktəbindən məhkəmə işçiləri ilə yanaşı prokurorluq işçilərinin də istifadə etməsi onların hüquqi savadlarını bir qədər də təkmilləşdirməyə xidmət etmiş olar. "Biz prokurorluğa yeni işə götürdüyümüz əməkdaşların tədris prosesini Prokurorluğun tədris mərkəzində həyata keçiririk, yaxşı olardı ki, bu tədris prosesini Ali Ədliyyə Məktəbində keçirək ki, prokurorluğa yeni qəbul olunmuş əməkdaşlar həqiqətən öz peşə hazırlığına görə prokurorluq orqanlarına layiq olsunlar" - deyə Qaralov söyləyib.
Baş prokuror eyni zamanda dövlət ittihamı ilə məşğul olan prokurorluq əməkdaşlarının da Ali Ədliyyə Məktəbinin müvafiq kurslarına cəlb edilməsini məqsədə müvafiq hesab edib.
"Bu gün peşəkar hüquqşünasların hazırlanmasında ciddi problemlər mövcuddur. Ali Ədlliyyə Məktəbi bu problemin böyük bir hissəsini aradan qaldıra biləcək" - deyə Z.Qaralov söyləyib.
Baş prokurorun digər təklifi isə Məhkəmə Hüquq Şurasının və Ali Məhkəmənin nəzdində metodik mərkəzlərin yaradılması ilə bağlı olub. "Bu, İnsan Hüquqları Üzrə Avropa Məhkəməsinin prefedent hüququnun öyrənilməsinə xidmət edə bilər. Həmin məhkəməyə vətəndaşlarımızın çoxsaylı şikayətləri daxil olur. Yaxşı olardı ki, metodik mərkəzlər yaradılsın və şikayətlərlə bağlı çıxarılmış qərarlar həin mərkəzlərdə tərcümə edilərək müvafiq məhkəmələrə göndərilsin"- deyə Qaralov qeyd edib.
Öz çıxışında baş prokuror həmçinin məhkəmə orqanındakı ciddi nöqsanlara da toxunub: "Məhkəmə orqanında hələlik ciddi nöqsan və çatışmazlıqlar mövcuddur. Bəzi hallarda korrupsiya hallarına da yol verilib. Bu məsələdə prokurorluq əməkdaşlarının da məsuliyyəti var" - deyə Qaralov vurğulayıb.
.jpg)
