Müxalifətyönlü Azərbaycan Milli İstiqlal Partiyasının baş katibi Fuad Muxtarov yanvarın 23-də partiyanın müvəqqəti qərərgahında ABŞ-ın Azərbaycandakı səfirinin siyasi məsələlər üzrə müşaviri Rebeka Naslindlə görüşüb.
Trend in məlumatına görə, görüşdə Azərbaycandakı ictimai-siyasi durum, demokratikləşmə prosesi və digər məsələlər müzakirə olunub.
F.Muxtarov ölkədəki mövcud problemlərin çözülməsində iqtidar-müxalifət dialoqunun zəruriliyini qeyd edib və AMİP-in dialoqun baş tutmasında maraqlı olduğunu bildirib.
Xanım Rebeka Naslind ABŞ-ın Azərbaycanda baş verən prosesləri diqqətlə izlədiyini bildirib. "ABŞ Azərbaycanda demokratiyanın inkişaf etməsində maraqlıdır və bu inkişafa hər cür dəstək verəcək", - deyə ABŞ səfirinin siyasi məsələlər üzrə müşaviri vurğulayıb.
Qeyd edək ki, AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir. Partiyanın hazırkı sədri Ayaz Rüstəmovdur. Etibar Məmmədov isə AMİP-in lideri vəzifəsini tutur.