Azərbaycan, Bakı, 197 mart / Trend , müxbir K. Zərbalıyeva/ Korrupsiya cinayətlərində ittiham olunan sabiq iqdisadi inkişaf naziri və onunla birgə həbs olunmuş şəxslərin apellyasiya şikayəti üzrə hazırlıq iclası davam edir.
Sabiq iqtisadi inkişaf naziri Əliyev və onun qardaşı, "Azpetrol" şirkətinin keçmiş prezidenti Rafiq Əliyev 2005-ci ilin oktyabrında həbs ediliblər. Həmin vaxt onların hər ikisi dövlət çevrilişi və kütləvi iğtişaşlar hazırlamaqda ittiham edilib.
Prosesdə təqsirləndirilənlər Fərhad Əliyev, Rafiq Əliyev, Mirməcid Əhmədov, Maarif Qurbanov, Məhəmmədnəbi Rüstəmov və Əlixan Paşayevun apellyasiya şikayətinə baxılır.
Günün birinci yarısında Fərhad Əliyevin vəkili Elton Quliyev vəsatətlə çıxış edərək, məhkəmə istintaqının təzələnməsi ilə məhkəmə baxışının yenidən aparılmasını xahiş edib. Vəkil bildirib ki, hüquqlarını müdafiə etdiyi şəxslə bağlı çoxsaylı vəsatətlər birinci instansiya məhkəməsində təmin olunmayıb və təqdim olunmuş sübutlar araşdırılmayıb.
Günün ikinci yarısında vəsatətlər müzakirə olunub və təmin edilməyib.
Sabiq nazirin vəkilləri vəsatətlərinin təmin olunmamasını, məhkəmənin müstəqil və qərəzsiz olmamasını əsas gətirərək, məhkəmənin tərkibinə etiraz edib.
Proses martın 29-dək təxirə salınıb.
Sonradan Əliyevə Cinayət Məcəlləsinin 179.3.1-ci (mütəşəkkil dəstə tərəfindən mənimsəmə və rüşvət alma), 179.3.2-ci (külli miqdarda mənimsəmə və israfetmə), 192.2.1-ci (külli miqdarda gəlir əldə etməklə qanunsuz sahibkarlıq), 192.2.2-ci ( mütəşəkkil dəstə tərəfindən qanunsuz sahibkarlıq), 206.4-cü (qaçaqmalçılıq) ,213-cü (vergi ödəməkdən yayınma), 308.2-ci (vəzifə səlahiyyətlərindən sui-istifadə), 311.3.1-ci (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma), 313.3.2-ci (rüşvət alma təkrar törədildikdə), 313.3.3-ci (külli miqdarda rüşvət alma), 313-cü (vəzifə saxtakarlığı), qardaşı Rafiq Əliyevə isə, 213 (vergi ödəməkdən yayınma) və 206.4-cü (qaçaqmalçılıq) maddələri ilə ittiham elan edilib.
Fərhad və Rafiq Əliyevlərə qarşı dövlət çevrilişi və kütləvi iğtişaşlar hazırlanması ilə bağlı elan olunan ittihamlar isə, ayrıca icraata götürülüb.
Ağır Cinayətlərə Dair İşlər üzrə Məhkəmənin hökmü ilə əmlakı müsadirə olunmaqla, sabiq nazir 10, qardaşı Rafiq Əliyev isə, 9 il azadlıqdan məhrum edilib. Həmçinin, məhkəmə Fərhad və Rafiq Əliyev qardaşlarının həbsdən azad olunduqdan sonra 5 il müddətinə dövlət vəzifəsi tutmalarını qadağan edən qərar çıxarıb.
