Azərbaycan, Bakı, 30 mart/ Trend , müxbir İ.Əlizadə/ Azərbaycan MDB ölkələrinə miqrasiya siyasəti ilə bağlı hesabat verəcək. "Azərbaycanın daxili işlər naziri, general-polkovnik Ramil Usubov MDB Parlamentlərarası Assambleyasının Sankt-Peterburqda keçiriləcək iclasında iştirak edəcək və miqrasiya məsələləri ilə bağlı çıxış edəcək. Nazir Azərbaycanın miqrasiya siyasəti haqqında məlumat verəcək və qanunsuz miqrasiya məsələlərinə toxunacaq", -deyə bazar günü Trend a açıqlamasında Azərbaycanın MDB Parlamentlərarası Assambleyasındakı nümayəndə heyətinin üzvü, millət vəkili Elmira Axundova məlumat verib.
MDB Parlamentlərarası Assambleyasının iclası aprelin 3 - 4 - də Sankt-Peterburqda keçiriləcək. İclasda dünyada, o cümlədən MDB ölkələrində miqrasiya məsələləri, miqrasiya siyasəti müzakirə olunacaq.
İclasda Milli Məclisin sədri Oqtay Əsədovun rəhbərlik etdiyi Azərbaycan nümayəndə heyəti də iştirak edəcək.
MDB Parlamentlərarası Assambleyasında 12 ölkə təmsil olunur.