Azərbaycan,Bakı,26 may / Trend , müxbir K.Zərbalıyeva/ "Azadlıq" qəzetinin bıçaqlanan müxbirinin mühafizəsi üçün iki polis ayrılıb.
Bu barədə bazar ertəsi Trend -a məlumat verən qəzetin direktoru Azər Əhməd bildirib ki, Aqil Xəlilin həyatına olan təhlükə ilə əlaqədar Çevik Polis Alayının iki əməkdaşı jurnalistin mühafizəsini həyata keçirəcək.
Xəlilə mayın 7-də metroda sui-qəsd edilməsi və onun oğurlanmasına cəhd edilməsi ilə bağlı məlumat verilib.
Direktorun sözlərinə görə, hakimiyyət ictimaiyyətin, beynəlxalq və yerli hüquq müdafiə təşkilatlarının çağırışlarına reaksiya verib və Xəlilin mühafizəsi üçün bu addımı atıb.
Baş Prokurorluq Xəlilin mayın 7-də metroda ona sui-qəsd edilməsi və oğurlanmasına cəhd edilməsi ilə bağlı açıqladığı məlumatların sübuta yetirilmədiyini bildirib. Prokurorluğun yaydığı məlumatda bildirilib ki, istintaq zamanı Xəlilə, onun ailə üzvlərinə mənəvi və fiziki təzyiqlər göstərilməyib, jurnalistə hər hansı işgəncə verilməyib.
Xəlil bu ilin fevralında "Zeytun bağı" adlanan ərazidə naməlum şaxslər tərəfindən döyülüb.
Bir neçə gün öncə Baş Prokurorluq jurnalistin döyülməsi ilə bağlı cinayət işinə xitam verib. İstintaq zamanı hadisənin şahidi olmuş şəxslər ifadələrində Xəlilin orada döyülmədiyini deyiblər.
Prokurorluğun məlumatında həmçinin deyilir ki, müxbirin martın 13-də bıçaqlanması faktı üzrə təqsirləndirilən Sergey Strekalinlə bağlı cinayət işi isə məhkəməyə göndərilib. Strekalin qəsdən sağlamlığa az ağır zərər vurma və satış məqsədi olmadan qanunsuz olaraq narkotik vasitələri əldə etmə və saxlamada ittiham olunur.
Müəlliflə əlaqə saxlamaq üçün elektron ünvan - [email protected]