...

Qafqaz Müsəlmanları İdarəsinin rəhbəri Azərbaycanda vətəndaşların dini azadlığının məhdudlaşdırılmasına dair hesabatları obyektiv saymır

Cəmiyyət Materials 1 İyul 2008 14:00 (UTC +04:00)

Azərbaycan, Bakı, 01 iyul / Trend , müxbir İ.Əlizadə/ Qafqaz Müsəlmanları İdarəsinin (QMİ) rəhbəri Şeyxülislam Hacı Allahşükür Paşazadə hesab edir ki, beynəlxalq təşkilatların Azərbaycanda vətəndaşların dini azadlığının məhdudlaşdırılmasına dair hesabatları obyektiv deyil.

"Belə hesabatlar Azərbaycanın daxili işlərinə qarışmaq üçün bir vasitədir", çərşənbə axşamı Trend -a QMİ sədri Paşazadə bildirib.

Trend -un arayışı: ABŞ Dövlət Departamentinin 2007-ci ildə dünya ölkələrində insan hüquqlarının vəziyyətinə dair hesabatında qeyd olunub ki, Azərbaycanda dini azadlıqlarla bağlı vəziyyət ötən il daha da pisləşib.

Paşazadə deyib ki, hər hansı bir təşkilatın Azərbaycanda dini vəziyyətlə yaxından tanış olmadan belə rəy verməsi düzgün deyil.

QMİ sədri hesab edir ki, Azərbaycan dini tolerantlığına görə dünya ölkələrinə nümunədir: "Biz bir müddət əvvəl Almaniya və Fransada konfranslar keçirdik. Həmin konfranslarda iştirak edən beynəlxalq ekspertlər Azərbaycanda din sahəsində olan vəziyyəti yüksək qiymətləndirdilər. Azərbaycanda yaşayan bütün xalqlar sərbəst şəkildə öz dini hüquqlarını həyata keçirə bilirlər. Ola bilər ki, vicdan azadlığı ilə bağlı hansısa çətinliklər var. Amma bu vəziyyətin pis olmasını deməyə əsas vermir", - Paşazadə əlavə edib.

Məqalə müəllifi ilə əlaqə ünvanı: [email protected]

Xəbər lenti

Xəbər lenti