Azərbaycan, Bakı, 24 iyul/ Trend , müxbir E.Babayev/ Azərbaycanın Avropa Şurası Parlament Assambleyasındakı (AŞ PA) nümayəndə heyətinin üzvü hesab edir ki, Azərbaycanda dini sahədə xaos yaratmaq cəhdləri var. "Dini yolla Azərbaycana daxil olmaq, ölkəni içindən parçalamaq cəhdləri mövcuddur", cümə axşamı Trend -a Azərbaycanın AŞ PA-dakı nümayəndə heyətinin üzvü, millət vəkili Gültəkin Hacıyeva bildirib.
Trend -un arayışı: Azərbaycanda dini icmaların qeydiyyatı ilə bağlı problem yoxdur. Qanunvericiliyə əsasən, dini icmalar Qeyri-Hökumət Təşkilatları kimi çox asanlıqla qeydiyyatdan keçə bilərlər. Bəzi ekspertlər din sahəsində qanunvericiliyin sərtəlşdirilməsini istəyirlər. Keçən il Azərbaycanda hüquq-mühafizə orqanları bir sıra dini qrupları zərərsizləşdirib.
2007-ci ilin oktyabr-noyabr aylarında Azərbaycanın Milli Təhlükəsizlik Nazirliyi tərəfindən keçirilən əməliyyat nəticəsində radikal vahabilərdən ibarət dəstə zərərsizləşdirilib. MTN-nin yaydığı rəsmi məlumatda bildirilib ki, həbs olunan şəxslər xarici diplomatik kopusda - Böyük Britaniya, ABŞ səfirliklərində terror aktları törətmək planları barədə açıqlamalar veriblər.
Bundan başqa, hüquq-mühafizə orqanları Şəki və Qusarda vahabilərə qarşı xüsusi əməliyyatlar keçiriblər. Şəkidə vahabiliyi təbliğ etməkdə şübhəli bilinən şəxsin evindən "Kalaşnikov" silahı və qadağan olunmuş dini kitablar müsadirə olunub. Qusarda vahabi olduğu güman edilən şəxsin həbsi üçün keçirilən əməliyyat, rayon Polis İdərəsinin iki əməkdaşının yaralanması ilə nəticələnib.
Hacıyeva Azərbaycana qarşı dini təhlükənin konkret hansı qüvvələr tərəfindən törədilməsi ehtimalının olduğunu açıqlamayıb. "Güclü, müstəqil, milli maraqlara söykənən siyasət yürüdən Azərbaycan heç də bütün qonşularımızı sevindirən faktor deyil. Bu baxımdan ölkəmizə müdaxilələr var. Ölkəyə başqa istiqamətlərdən daxil olmaq cəhdləri var. Ən uğurlu zəmin isə din sahəsidir", - deyən Hacıyevanın sözlərinə görə, dini sahədə qayda-qanun yaratmaq lazımdır. "Azərbaycanda qeyri-ənənəvi dini sektaların fəaliyyəti kifayət qədər genişdir. Missioner təşkilatlar Azərbaycanda fəaliyyət göstərir və dəfələrlə missioner təşkilatların fəaliyyəti ilə bağlı mətbuatda məlumatlar gedir. Bu informasiyalar yoxdan yaranmır və ciddi mənbələrə söykənir. Azərbaycan bölgənin çox mühüm, cəlbedici, perspektivli, lider ölkəsidir. Bu ölkəni poliqona çevirmək, burada öz maraqlarını bərqərar etmək cəhdləri həmişə olub", - deyə Hacıyeva qeyd edib.
Məqalə müəllifi ilə əlaqə ünvanı: [email protected]
