Azərbaycan, Bakı, 17 fevral / Trend , müxbir H.Bağırov/
Azərbaycanda ağır cinayətlər törətməkdə təqsirli bilinən hərbi qulluqçuların məhkəməsi başlayıb.
Trend -un məlumatına görə, bu gün Ağır Cinayətlərə Dair İşlər üzrə Hərbi Məhkəmədə Müdafiə Nazirliyinin "N" saylı hərbi hissəsinin əsgərləri Yusif Oqtay oğlu Yusifov, Emin Sahib oğlu Rəhimov, Toğrul Qulu oğlu Bağırovun cinayət işi üzrə məhkəmənin hazırlıq iclası keçirilib.
İclasda məhkəmə baxışının martın 1-də keçirilməsi qərara alınıb. Məhkəmə qapalı keçiriləcək.
Təqsirləndirilən şəxslər döyüş şəraitində yerləşən tağımın dayaq məntəqəsində əsgərlərə qarşı əvvəllər törətdikləri seksual xarakterli zorakılıq hərəkətləri faktı üzrə daxili təhqiqat aparan tağımın komandiri, leytenant Elşən Şəmil oğlu Tağıyev və üçüncü tağım komandirinin müavini, gizir Ramal Vəliəhd oğlu Əmrahovu qisas almaq məqsədi ilə öldürmək qərarına gəliblər. Onlar 2009-cu il iyulun 18-də saat 18:30-da Rəhimov dəyişdirici olduğu vaxt silah-sursat otağını açaraq oradan avtomat silahları götürüb onları döyüş vəziyyətinə gətirərək, Tağıyev və Əmrahovu qətlə yetiriblər.
Cinayət iş üzrə 28 nəfər zərərçəkmiş şəxs kimi tanınıb. Həmin zərərçəkmişlərdən 26-ı təqsirləndirilən şəxslər tərəfindən cinsi zorakılığa məruz qalıblar.
Təqsirləndirilənlər Cinayət Məcəlləsinin bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən, zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar onun özünü və ya yaxın qohumlarını, iki və ya daha çox şəxsi qəsdən öldürmə (120.2.1, 120.2.3, 120.2.7), qabaqcadan əlbir olan bir qrup şəxs tərəfindən, təkrar insanların həyatı və ya sağlamlığı üçün təhlükəli olmayan zor tətbiq etməklə, yaşayış sahəsinə, habelə binaya, anbara və ya başqa saxlanc yerlərinə qanunsuz olaraq girməklə soyğunçuluq törətmək (180.2.1, 180.2.2, 180.2.3), seksual xarakterli zorakılıq hərəkətlər təkrar törədildikdə (150.2.5), hərbi xidmət üzrə vəzifələrin yerinə yetirilməsi zamanı və ya belə vəzifələrin yerinə yetirilməsi ilə əlaqədar rəisin öz tabeliyində olan şəxsi, habelə tabelikdə olan şəxsin öz rəisini təhqir etməsi (331), tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma təkrar törədildikdə (332.2.1), Azərbaycan Respublikasına qəfil hücumun vaxtında aşkara çıxarılması və dəf olunması üzrə, yaxud onun təhlükəsizliyinin təmin edilməsi üzrə döyüş növbəsi (döyüş xidməti) çəkmə qaydalarını pozma, əgər bu əməllər dövlətin təhlükəsizlik mənafelərinə zərər vura bilərdisə (338.1), hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə (341.1) maddələri ilə ittiham olunurlar.