Azərbaycan, Bakı, 12 avqust /Trend, müxbir M.Əliyev/
2011-2012-ci il ali təhsil müəssisələrinin qəbul imtahanlarında iştirak edən əlaçılardan 100 bal toplaya bilməyən abituriyentlər olub. Trend-in məlumatına görə, bu barədə Tələbə Qəbulu üzrə Dövlət Komissiyası (TQDK) sədri Məleykə Abbaszadə cümə günü keçirdiyi mətbuat konfransında deyib.
"Bu il əlaçı attestat alanların 1,2 faizi 0-100 bal arasında nəticə göstərib. Nəzərə alsaq ki, 2004-cü ildə bu nəticə 14 faizə bərabər idi, bu il göstərici yaxşılaşıb, lakin yalançı əlaçıların sayı daha da azalmalıdır", - Abbaszadə deyib.
Onun sözlərinə görə, qəbul imtahanlarında 0-100 bal toplayan şəxslər "2" kimi qiymətləndirilir.
"Lakin 87 faiz attestat qiyməti "3" olan abituriyent 100 baldan çox toplaya bilməyib", - sədr deyib.
Onun sözlərinə görə, bu da həmin şəxslərin attestat qiymətini şübhə altına alır.
Abbaszadə hesab edir ki, TQDK-nın nümayiş etdirdiyi nəticələrin aşkarlığı yalançı attestat qiymətlərinin aşkarlanmasına təsir göstərir.
Ümumilikdə bu il orta məktəbi qızıl diplomla və əlaçı bitirənlərin qəbul imtahanlarında orta balı 500 bal təşkil edib.