Azərbaycan, Bakı, 27 iyun /Trend, müxbir A.Axundov/
Azərbaycan ölkənin təhsil sistemində islahatlar üzrə Dünya Bankı (DB) ilə əməkdaşlığı davam etdirmək niyyətindədir. Trend-in məlumatına görə, bu barədə çərşənbə günü jurnalistlərə təhsil naziri Misir Mərdanov bildirib.
"Hazırda Azərbaycanda təhsil sahəsində islahatların aparılması üzrə DB-nin üçüncü layihəsi həyata keçirilir. Layihənin 2014-cü ildə başa çartdırılması planlaşdırılır. Biz mövcud sahədə DB ilə əməkdaşlığı davam etdirməyə hazırıq", - Mərdanov deyib.
Nazirin sözlərinə görə, hazırda Azərbaycan və Dünya Bankı ali təhsil sisteminin təkmilləşdirilməsi və islahatların aparılması sahəsində yeni layihə hazırlayırlar.
"Layihə baxılması üçün ölkə hökumətinə təqdim edilib. Əgər layihə bəyənilərsə, biz onun həyata keçirilməsinə başlayacağıq", - Mərdanov vurğulayıb.
DB bu layihənin reallaşdırılmasına, bankın belə layihələrin maliyyələşdirilməsi üzrə təcrübəsinə əsasən, 30-40 milyon dollara yaxın vəsait ayırmağı planlaşdırır.
