Azərbaycan, Bakı, 13 sentyabr /Trend, müxbir İ.İsabalayeva/
Azərbaycan Təhsil Nazirliyi təhsil müəssisələrinin akkreditasiyasının dövlət standartlarına uyğunluğu meyarlarında dəyişikliklər ediləcək. Bunu cümə axşamı Trend-ə TN-in Akkreditasiya şöbəsinin müdiri Həbib Zərbəliyev deyib.
Onun sözlərinə görə, dəyişikliklər əsasən təhsil müəssisələrinin maddi-texniki bazasının qurulmasına qoyulan tələblərlə bağlıdır.
Zərbəliyev deyib ki, Nazirlər Kabinetinin bu il aprelin 23-də təsdiqlədiyi "Təhsil müəssisəsinin maddi-texniki bazası və təhsil infrastrukturu normativləri" və avqustun 3-də təsdiqlədiyi "Təhsil müəssisələrinin tikintisinə, maddi-texniki təchizatına dair vahid normalar, ümumi sanitariya-gigiyena tələbləri, şagird yerləri ilə təminat normativlər" əsasında təhsil müəssisəsinin maddi-texniki bazasına və infrastrukturunun qurulmasına yeni tələblər qoyulub.
Zərbəliyev bildirib ki, həmin normativlərdə edilmiş dəyişikliklər meyarlarda da öz əksini tapacaq. O, hazırda bununla bağlı işlərin aparıldığını qeyd edib.