Bakı. Trend:
Gələn ildən etibarən turizm şirkətlərinin əmlak vergisində 75 faiz güzəşt tətbiq olunacaq. Praktiki olaraq bu o anlama gəlir ki, turizm şirkətləri hesabladıqları əmlak vergisinin yalnız 25 faizini ödəyəcəklər.
Bunu Trend-ə Milli Məclisin deputatı Vüqar Bayramov deyib.
O qeyd edib ki, 75 faizlik güzəştin tətbiq edilməsi turizm şirkətlərinin xərcinə təsir edəcək, turizm obyektlərində xərclərin azalmasına səbəb olacaq.
“Xərclərin azalması turizm obyektləri və şirktləri üçün daha aşağı xərclə və aşağı qiymətə xidmətlərin təklif edilməsi anlamına gəlir. Gözlənti ondan ibarətdir ki, gələn ildən etibarən daxili turizmdə qiymətlərin aşağı düşməsi mümkündür. Çünki xərclər azalır və bu, turizm şirkətlərinə imkan verəcək ki, daha aşağı qiymətə xidmətlər göstərsinlər”, - deyə o, əlavə edib.
Qeyd edə ki, Milli Məclisin dekabrın 5-də keçirilən iclasında müzakirə edilən Vergi Məcəlləsinə dəyişiklikdə bir sıra gedişlər öz əksini tapıb. Layihəyə əsasən, Bakı, Sumqayıt, Xırdalan şəhərləri və Abşeron rayonu istisna olmaqla, respublikanın digər şəhər və rayonlarında mehmanxana (hotel) və sanatoriya fəaliyyətlərində istifadə edilən (Vergi Məcəlləsinin 16.3-cü maddəsinə müvafiq olaraq sahibkarlıq fəaliyyətinin müvəqqəti dayandırıldığı hallar istisna olmaqla) daşınmaz əmlaklara görə əmlak vergisi 2024-cü il yanvarın 1-dən 3 il müddətinə 75 faiz azaldılacaq. Müzakirələrdən sonra dəyişiklik səsverməyə qoyularaq üçüncü oxunuşda təsdiq edilib.