Azərbaycan və Birləşmiş Ərəb Əmirlikləri turizm sahəsində əməkdaşlıq haqqında saziş imzalayacaq. Sənədin layihəsi Azərbaycanın Gənclər, İdman və Turizm nazirliyinin baş turizm idarəsinin ekspertləri tərəfindən hazırlanıb. Bu barədə Trend ə idarədən bildirilib.
Azərbaycan tərəfi layihəyə ölkədə turizmin inkişafına investisiyaların cəlb olunması, birgə müəssisələrin yaradılması, Azərbaycan və BƏƏ-nin tarixi yerlərinə turist səyahətlərinin təşkili, hər iki ölkənin iri şəhərlərində informasiya mərkəzlərinin yaradılması ilə bağlı təkliflərini daxil edib.
Hazırda Əbu-Dabidə turizm üzrə biznes-forumun keçirilməsi planlaşdırılır.
Forumda ölkənin turizm potensialına ərəb biznesmenlərinin marağını cəlb etmək üçün onun təqdimatı keçiriləcək. Tədbir çərçivəsində bu sahəyə kapital qoyuluşunun perspektivləri haqqında ətraflı məlumatın veriləcəyi sərgilər təşkil olunacaq.