Digər oyunların nəticələri haqqında məlumat əlavə olunub (ilk xəbər saat 16:54-də yayılıb)
Azərbaycan, Bakı, 13 mart /Trend/
Bu gün Azərbaycan Kubokunun ¼ final mərhələsinin cavab oyunları keçirilib.
Trend-in məlumatına görə, "Bakı" doğma meydanda "Qarabağ"ı qəbul edib. İlk görüşdə 3:0 hesabı ilə qalib gələn Ağdam təmsilçisi bu dəfə də rəqibinə göz açmağa imkan verməyib.
Hesabı 8-ci dəqiqədə "Bakı"nın heyətində Mahir Mədətov açsa da, "Qarabağ" futbolçuları təşəbbüsü ələ ala biliblər. 15, 59 və 70-ci dəqiqələrdə Vüqar Nadirov, 57-ci dəqiqədə isə Cavid Tağıyev fərqlənib - 1:4.
Digər oyun AZAL və "Neftçi" komandaları arasında keçirilib. İlk görüşdə qolsuz bərabərlik qeydə alınsa da, cavab oyununda "Neftçi" Julius Vobayın qolu ilə minimal hesablı qələbə qazanıb - 0:1.
Öz meydanında "Xəzər Lənkəran"ı 2:0 hesabı ilə məğlub edən "İnter" səfərdə də cənub təmsilçisindən üstün olub - 0:3.
Səfərdə "Qəbələ"yə 3 topla qalib gələn "Simurq" isə doğma meydanda rəqibini məğlub edə bilməsə də, qolsuz bərabərlik (0:0) zaqatalalıları yarımfinala yüksəldib.
Beləliklə, Azərbaycan Kubokunun yarımfinal mərhələsində "Neftçi" "İnter"lə, "Qarabağ" isə "Simurq"la qarşılaşacaq.
Qeyd edək ki, bu mərhələnin oyunları 13-21 aprel tarixlərində keçiriləcək.