...

İşsizlikdən sığorta sistemi özünüməşğulluq proqramının genişlənməsinə əsas yaradacaq (FOTO)

İqtisadiyyat Materials 17 Noyabr 2017 14:58
MDB dövlətlərinin Məşvərət Şurasının iclasında Azərbaycanda əmək və sosial müdafiə sahəsində aparılan islahatlara dair məlumatlar böyük maraqla qarşılanıb.
İşsizlikdən sığorta sistemi özünüməşğulluq proqramının genişlənməsinə əsas yaradacaq (FOTO)

Trend-i buradan izləyin

Bakı. Trend:

MDB dövlətlərinin Məşvərət Şurasının iclasında Azərbaycanda əmək və sosial müdafiə sahəsində aparılan islahatlara dair məlumatlar böyük maraqla qarşılanıb.

Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən Trend-ə verilən məlumata görə, Rusiya Federasiyasının Sankt-Peterburq şəhərində MDB dövlətlərinin Əmək, miqrasiya və əhalinin sosial müdafiəsi üzrə Məşvərət Şurasının XXX yubiley iclası keçirilib.

Məşvərət Şurası əmək münasibətləri, məşğulluq, əmək miqrasiyası, əhalinin sosial müdafiəsi, əməyin mühafizəsi sahələrində MDB dövlətləri arasında əməkdaşlığın həyata keçirilməsi, müvafiq sahədə qanunvericiliyin təkmilləşdirilməsi işlərində məlumat mübadiləsinin təşkili, eləcə də bu sahədə dövlətlərarası sazişlərin hazırlanması məqsədinə xidmət edir.

İclasda iştirak edən Azərbaycanın əmək və əhalinin sosial müdafiəsi nazirinin müavini Natiq Məmmədov Prezident İlham Əliyevin tapşırıqlarına uyğun olaraq, ölkədə etibarlı sosial müdafiə sisteminin formalaşdığını vurğulayıb. Nazir müavini ölkədə icra olunan mühüm sosial proqramlar, əmək və sosial müdafiə sisteminin yeni innovativ yanaşmalar əsasında təkmilləşdirilməsi üçün son illərdə aparılan sistem xarakterli islahatlar barədə iclas iştirakçılarını məlumatlandırıb.

Azərbaycanın əmək və sosial müdafiə sahələrində yaradılan avtomatlaşdırılmış sistemlər (Əmək Müqaviləsi Bildirişi üzrə Elektron İnformasiya Sistemi, ünvanlı dövlət sosial yardımı üzrə Vahid Elektron Müraciət və Təyinat Alt Sistemi, Tibbi-Sosial Ekspertiza və Reabilitasiya Alt Sistemi, Avtomatlaşdırılmış pensiya təyinatı sistemi) barədə məlumat verilib. Beynəlxalq səviyyədə də yüksək dəyərləndirilən bu sistemlərin müvafiq sahələrdə idarəetmənin müasir və səmərəli təşkilinə, dövlət xidmətlərinin elektron müstəvidə şəffaflaşdırılmasına, müvafiq əhali qruplarına əlçatanlığının təmin olunmasına imkan yaratdığı vurğulanıb.

Həmçinin, əlilliyin və sağlamlıq imkanlarının məhdudluğun qiymətləndirilməsi sisteminin elektron infrastrukturundan bəhs olunub. Qeyd olunub ki, Əmək və Əhalinin Sosial Müdafiəsi Nazirliyinin Mərkəzləşdirilmiş İnformasiya Sistemində Tibbi-Sosial Ekspertiza və Əlillərin Reabilitasiyası Alt Sistemi əlilliyin müəyyən olunması üçün verilmiş göndərişin kimə aid olduğu, hətta hansı rayon və şəhərin səhiyyə müəssisəsindən göndərildiyi bilinmədən, tam obyektiv və şəffaf şəkildə əlillik qrupunun təyin olunub-olunmamasına dair qərar qəbul edilməsinə imkan verir. Bu sistem müvafiq məsələlərlə (o cümlədən əlilliyə görə pensiya və ya müavinət təyin olunması, sağlamlıq imkanları məhdud şəxslərə qəbul imtahanları zamanı zəruri köməkliyin göstərilməsi, imtahan binalarında onlara münasib şəraitin əvvəlcədən yaradılması, çağırış yaşlı şəxslər üzrə məlumatın ötürülməsi, əlilliyi olan şəxsin əmək zəmanəti barədə işəgötürənə elektron məlumatın verilməsi və s.) bağlı aidiyyəti qurumlar arasında elektron məlumat mübadiləsinə də şərait yaradıb.

Azərbaycanda beynəlxalq standartlar səviyyəsində qurulan müasir sığorta-pensiya sistemi barədə də məlumat verilib. Cari ildə sığorta-pensiya sisteminin uzunmüddətli inkişafına yönələn növbəti islahat tədbiri nəticəsində ölkədə tam sığorta əsaslı pensiya təminatına keçildiyi qeyd edilib. Bu islahat tədbirinin işləyən əhalinin bu sistemdə iştirak səviyyəsinin daha da artırılmasını stimullaşdırdığı, vətəndaşların layiqli pensiya təminatı imkanlarını artırdığı diqqətə çatdırılıb. Eyni zamanda, ölkədə aztəminatlı ailələrin sosial yardım sistemindən asılılığının aradan qaldırılması və kiçik ailə biznesinə keçidinin təmin olunması üçün icra olunan özünüməşğulluq proqramından bəhs olunub. Azərbaycanda gələn ildən tətbiq ediləcək işsizlikdən sığorta sisteminin eyni zamanda aktiv məşğulluq tədbirlərinin, habelə özünüməşğulluq proqramının genişlənməsinə əsas yaradacağı bildirilib.

Azərbaycanda əmək və sosial müdafiə sahəsində aparılan islahatlara dair məlumatlar iclas iştirakçıları tərəfindən böyük maraqla qarşılanıb.

İclasda MDB iştirakçısı olan dövlətlərin əmək, məşğulluq və əhalinin sosial müdafiəsi sahəsində qarşılıqlı əməkdaşlığına, gələcək fəaliyyət istiqamətlərinə, ailə və demoqrafik siyasətlə bağlı həyata keçirilən tədbirlərə, əhaliyə sosial xidmətlərin göstərilməsini tənzimləyən qanunvericiliyin təkmilləşdirilməsinə dair müzakirələr aparılıb.

Məqalədə:
Xəbər lenti

Xəbər lenti